«Мураббий ўзгардими, демак нимадир нотўғри кетяпти» – Катанец расман бош мураббий бўлди

Тадбирда ЎФА биринчи вице-президенти Равшан Эрматов сўз олиб, мураббий танлаш жараёни ва Катанец номзодига тўхталиш сабаблари ҳақида гапириб берди.

«ЎФА мутасаддилари миллий жамоага янги мураббий танлаш жараёнида 30 дан ортиқ мураббий вариантини кўриб чиқдик. Улар орасида бир қатор номдор мутахассислар ҳам бор эди. Лекин мураббийлар кенгаши бизга аниқ критерияларни белгилаб беришди. Бунга кўра, янги мураббий миллий жамоалар билан ишлаш тажрибасига эга бўлиши, хориждан, имкон қадар Европадан бўлиши керак эди. Сабаби, бугунги кун футболида Европа устунлик қилмоқда ва жадаллик билан ривожланяпти.

Иккинчидан, Ўзбекистонда ишлашга бўлган хоҳиш, истак ва амбиция муҳим аҳамият касб этарди. Учинчидан, биз кўплаб мураббийларни таҳлил қилганимизда, улар асосан йиғинлар пайтида келиб, бошқа пайтларда ўзлари истиқомат қиладиган давлатда бўлишни маъқул кўришларига гувоҳ бўлдик. Биз эса янги мураббий Ўзбекистонда яшаб, миллий чемпионатимизни синчковлик билан кузатиб, биз билан биргаликда иш олиб бориши керак деган қарорга келдик. Ва ниҳоят, янги мураббийнинг штабида замонавий технологиялар билан ишловчи мутахассис бўлиши кўзда тутилиши керак, деб қарор қилинди.

Шу тариқа, ўзбек футболи мухлисларининг Жаҳон чемпионатига чиқиш ҳақидаги узоқ йиллик орзуларини рўёбга чиқариш мақсадида, миллий жамоамиз бош мураббийлигига Сречко Катанец номзодида тўхталдик», деди Эрматов.

Шундан сўнг, Сречко Катанец сўз олиб, миллий жамоа бош мураббийи сифатидаги мулоҳазалари билан ўртоқлашди ва журналистларни қизиқтирган бир қатор саволларга жавоб берди.

«Ҳаммага салом. Мен ва ёрдамчиларим бу ерда эканимиздан хурсандмиз. Ўзбекистон футбол ассоциациясига бизга ушбу имконни тақдим этгани учун миннатдорчилик билдирмоқчиман. Мақсадимиз – жаҳон чемпионати йўлланмаси. Бунинг учун кўп ишни амалга оширишимиз керак. Яхши, ёш футболчиларни топишимиз керак. Мослашиб олиш учун бироз вақт керак бўлади. Мундиалга чиқиш учун биз ростдан ҳам кучли бўлишимиз керак.

Бу йўлда медиа ва мухлислар бизга катта ёрдам беради деб ўйлайман. Умид қиламан, тез орада коронавирус билан боғлиқ муаммолар ҳал бўлиб, мухлислар билан тўла стадионда ўйнаймиз. Улар жамоани ҳар қандай ҳолатда, мағлубиятда ҳам, ғалабада ҳам бир хил қўллашларига умид қиламан.

Биз бир ҳафта олдин бу ерга етиб келдик, бир нечта ўйинларни кўрдик. Муҳими – ассоциация бизга юклаган вазифаларни бажара олишимиз. Биласиз, бир қатор тажрибали футболчилар жамоани тарк этди, уларнинг ўрнини ёшлар билан тўлдиришимиз керак. Ёшлар эса хато қилиб туради.

Ўзимдан олдинги мураббийнинг ҳаракатларини муҳокама қилмоқчи эмасман, бу журналистларнинг иши. Ўзбек футболида доим юқори техникали футболчилар тўп тепган. Лекин биз тактика устида кўп ишлашимиз, жамоавий руҳиятни кўтаришимиз керак. Миллий жамоада мен эмас, биз деган нарса бўлиши муҳим.

Нега Ўзбекистонга боряпман, деб ўйладимми? Ҳа, мен бу борада мулоҳаза юритдим. Қайсидир жамоа мураббийини алмаштираётган экан, демак нимадир нотўғри кетяпти. Осиёда кўп йиллардан бери ишлайман. Ўзбекистон деганда доим кўплаб яхши футболчилар, техник маҳорат кўз олдимга келади. Жамоанинг даражаси жуда яхши. Лекин футболнинг бошқа бир тарафи ташкиллаштириш, кураш, жисмоний тайёргарлик кабиларга боғлиқ. Буларни ўз ўрнига қўймас экансиз, ғалаба қозона олмайсиз. Фикримча, айнан мана шу жиҳатларни кучайтиришимиз керак.

Сиз футбол дунёсини кузатишингиз табиий. Италия қандай ғалаба қозонди? Улар Испанияга қарши ўйинда ҳимояда ўйнашди, лекин барчасини назорат остида ушлаб туришди. Ҳа, улар чиройли техник элементларни кўрсата олишмагандир, лекин футбол фақат чиройли ўйиндан иборат эмас. Футболчилар ақлли фолларни ишлата билиши, қаерда футболчини йиқитиш кераклигини билиши лозим. Бизга мана шундай курашувчан футбол керак.

Бизга дастлабки ойларда яхши консультант керак бўлади. Шундан сўнг, биз барчасини билиб оламиз ва жамоам билан ўз ишимизни ҳеч қандай қўшимча ёрдамсиз қила оламиз. Менга яна яхши таржимон ҳам керак. У менинг эмоцияларимга ҳамоҳанг бўлиши, хурсандлигимда хурсанд, жаҳлим чиққанда ҳам шуни ифодалаб бера оладиган бўлиши лозим. Бу жуда муҳим жиҳат. Футболчилар ва менинг ўртамдаги алоқаларда таржимоннинг роли юқори. Вақт ўтгани сайин бу ҳолатни ҳам енгиб, футболчилар билан яхши тил топишиб кетамиз. Чунки, бизнинг ишда битта тил бор – футбол тили», деди Катанец.

Маълумот учун, словениялик мутахассис миллий жамоа билан дебют ўйинини 5 сентябр куни Стокҳольмдаги «Фрэндс арена»да Швеция миллий жамоасига қарши ўтказади.