Тегишли қарорни 31 август куни қироллик бош вазири ва ички ишлар вазири Анутхин Чанвиракун имзолади, ҳужжат Қироллик газетасида (Royal Gazette) эълон қилинди. Янги қоидалар ҳужжат эълон қилинганидан 15 кун ўтгач — 2026 йил 15 сентябрдан кучга киради. Бу ҳақда Bangkok Post хабар берди.
Нималар ўзгаряпти?
Шу кундан бошлаб Таиланд 93 та давлат учун ягона 60 кунлик визасиз режим ўрнига бир нечта алоҳида тоифани жорий этади:
30 кунлик визасиз кириш — 60 та мамлакат ва ҳудуд, жумладан, Европанинг аксарият давлатлари, АҚШ, Буюк Британия, Канада, Австралия, Хитой, Япония, Россия ва Исроил фуқаролари учун;
15 кунлик визасиз кириш — икки давлат (Сейшел ороллари ва Маврикий) фуқаролари учун;
Таиландга борганда олинадиган виза (Visa on Arrival) — фақат уч давлат: Озарбойжон, Беларус ва Сербия учун сақлаб қолинди.
Ўзбекистон бу рўйхатларнинг бирортасига ҳам киритилмади. Бу эса ўзбекистонликлар учун визасиз режим бутунлай бекор қилинишини англатади — 15 сентябрдан бошлаб визани парвоздан олдин, олдиндан расмийлаштириш керак бўлади.
Нима учун Таиланд қоидаларни кучайтирмоқда?
Таиланд ҳукумати вакилларининг сўзларига кўра, виза сиёсатининг қайта кўриб чиқилишига хорижликлар томонидан визасиз режимни суиистеъмол қилиш ҳолатлари кўпайгани сабаб бўлмоқда — ноқонуний меҳнат фаолияти ва рухсатномасиз бизнес юритишдан тортиб, фирибгарлик схемаларида иштирок этишгача. Шунингдек, «визаран»ларга ҳам чеклов жорий этилмоқда: энди қуруқликдаги чегара орқали мамлакатга визасиз бир йилда икки мартадан кўп кириш мумкин эмас (Малайзия, Бруней, Индонезия ва Сингапур фуқаролари бундан мустасно).
Ўзгаришлар кимларга таъсир қилади?
Янги талаблар фақат 15 сентябрдан бошлаб Таиландга кириб келадиган шахсларга нисбатан қўлланади. Бу санагача келган сайёҳлар ўзига берилган 60 кунлик муддатдан тўлиқ фойдаланиши мумкин.
Uzbekistan Airways авиакомпанияси HY531 «Тошкент—Бангкок» рейсига алоҳида эътибор қаратди:
