Ўзбекистон ва Қозоғистон 611 млн долларлик 54та инвестиция шартномасини имзолади

Жорий йилнинг 26 ноябрь куни Туркистонда Ўзбекистон ҳукумат раҳбари Абдулла Арипов ва Қозоғистон бош вазири Асқар Мамин икки давлат ўртасидаги III минтақалараро ҳамкорлик форумида иштирок этди. Бу ҳақда Қозоғистон бош вазири матбуот хизмати хабар берди.

Фото: primeminister.kz

Икки юзга яқин киши – давлат органлари, ҳудудлар раҳбарлари, шунингдек, икки мамлакат ишбилармон доиралари вакиллари иштирок этган форумнинг мавзуси «Трансчегаравий ҳамкорлик – ривожланишнинг янги нуқталари» деб номланди.

Қайд этилишича, форум доирасида машинасозлик, агросаноат комплекси, қурилиш материаллари, электротехника маҳсулотлари, тиббиёт буюмлари ишлаб чиқариш, инфратузилмани ривожлантириш ва бошқа соҳаларда 611,3 млн долларлик жами 54 та инвестиция ва тижорат шартномалари имзоланган.