Ҳодиса жорий йил октябрь ойида вестерн жанридаги «Занг» (The Rust) фильмини суратга олиш жараёнида содир бўлди. Актёр Алек Болдуин фильмда ҳам актёр, ҳам продюсер сифатида иштирок этаётганди.
«Мен қуролни ҳеч қачон одамга йўналтирмаган ва тепкини босмаган бўлардим. Ҳеч қачон», — деди актёр BBC телеканалига фожиадан кейин берган катта интервьюсида. У ўтган сешанба куни ёзиб олинган, телеканал эфирида чоршанба куни эълон қилинган, пайшанба куни кечки пайт эса тўлиқ намойиш этилди.
Аввалроқ Болдуин содир бўлган воқеани уни кутиб турган журналистлар учун фақат бир марта қисқа равишда изоҳлаганди ҳамда ўзи ва оиласини тергов якунига қадар таъқиб қилмасликни сўраганди.
Шу пайтгача прокуратуранинг асосий версияси шундан иборат эдики, Алек Болдуин Ҳатчинсга реквизит қуролни йўналтирган ва саҳна репетицияси вақтида у ўқланганини билмай, ўқ узган. Қуролдан отилган яна бир ўқ фильм режиссёри Жоэль Соузенинг елкасига теккан.
Америкалик машҳур журналист Жорж Стефанопулосга берган интервьюсида Болдуин жанговар патронлар қандай қилиб тўппонча ичида пайдо бўлганини билмаслигини айтган.
«Кимдир уни солиб қўйган. Бундай патрон майдончада умуман бўлмаслиги керак эди», — деди актёр.
Жорж Стефанопулоснинг сўзларига кўра, уларнинг бир ярим соатлик суҳбати оғриқли ва чуқур ҳисларга тўла бўлган.
«Мен BBC’даги 20 йиллик фаолиятим давомида минглаб интервью олганман. Бу амалиётимдаги энг оғири бўлди», деди Стефанопулос.
«Ҳали ҳам ишонмаяпман»
Тергов материалларида айтилишича, суратга олиш жараёнида қуролни Болдуинга режиссёр ёрдамчиси Дэйв Ҳоллс берган. У тартибга амал қилган ҳолда «cold gun», яъни киночилар тилида қурол хавфсиз (жанговар патрон билан ўқланмаган) дея бақирган.
Ҳоллснинг ўзи тўппончани қурол реквизитлари бўйича менежер Хан Гутьеррес-Риддан олган. Унинг адвокатларининг айтишича, у қуролдаги жанговар патрон қаердан пайдо бўлганини билмайди. Ҳозирда бу тергов жавоб беришга ҳаракат қилаётган энг муҳим савол.
«Ҳатто ҳозир ҳам бу ҳақиқатан содир бўлганига ишона олмайман. Нореаллик ҳисси мавжуд», — деди актёр BBC’га берган интервьюсида.
