Актриса Дайан Китон вафот этди

Афсонавий америкалик актриса Дайан Китон 79 ёшида Калифорниядаги уйида вафот этди, деб хабар берди унинг оиласи Американинг People порталига. New York Times манбаси ҳам актрисанинг вафотини тасдиқлади. Унинг ўлими сабаблари номаълум, бироқ актриса сўнгги бир неча ой мобайнида омма олдида кўриниш бермаётганди.

Асли исми-шарифи Дайан Ҳолл бўлган актриса 1946 йилда Лос-Анжелесда туғилган, 1970 йилда «Любовники и другие незнакомцы» комедиясида дебют қилган. Актриса Фрэнсис Форд Копполанинг «Чўқинтирган ота» (1972) филмидан кейин машҳурликка эришган, бу филмда у бош қаҳрамон, Ал Пачино ижросидаги Майкл Корлеоненинг рафиқаси Кей Адамс ролини ўйнаганди. Кейинроқ филмнинг икки сиквелида ҳам қатнашган.

У ўтган асрнинг 70-йилларида Вуди Аллен билан ҳамкорлик қила бошлайди ҳамда унинг «Севги ва ўлим» (1975) ва «Энни Ҳолл» (1977) каби филмларида суратга тушади. 1977 йилда айнан «Энни Ҳолл» филмидаги роли учун энг яхши актриса сифатида «Оскар» мукофотига сазовор бўлади.

У, шунингдек, «Қизиллар» (1981), «Марвин хонаси» (1996) ҳамда «Қоидалар ва қоидасиз севги» (2003) филмларидаги роллари учун «Оскар»га номзод бўлган.

Китон яна бир қатор филм ва сериалларда, жумладан, «Дорини қидириш», «Китоб клуби», «Оилавий тош», «Чунки мен шуни хоҳлайман» кабиларда рол ўйнаган.

Ҳолливуддаги ҳамкасблари билан ишқий муносабатлар ҳақидаги миш-мишларга қарамай, Дайан Китон ҳеч қачон турмушга чиқмаган.

У икки бола асраб олади: 1996 йилда асраб олган қизига «Филаделфия ҳикояси» филмида Кэри Грант ўйнаган персонаж шарафига Декстер исмини қўйган.Тўрт йил ўтиб асраб олган ўғлини Дюк деб атаган. «Оналик мени бутунлай ўзгартириб юборди», – деганди у ўшанда.

У билан «Биринчи рафиқалар клуби» филмида бирга ишлаган ҳамкасби Бетт Мидлер Инстаграмда шундай деб ёзди: «Ёрқин, гўзал, ғайриоддий Дайан Китон вафот этди. Бундан қанчалик хафа бўлганимни тасвирлаб беролмайман. У ниҳоятда кулгили, мутлақо ўзига хос, бундай юлдуздан кутиш мумкин бўлган ҳеч қандай айёрлик ва рақобат йўқ эди».

Актёр Бен Стиллер Х ижтимоий тармоғида шундай пост қолдирди: «Дайан Китон. Барча даврларнинг энг буюк кино актрисаларидан бири. Услуб, ҳазил ва комедия тимсоли. Ёрқин шахс».

Актриса 1993 йилда Алцгеймер касаллиги ташхиси қўйилган онасига 2008 йилда вафот этгунига қадар ғамхўрлик қилганди.

«У мен учун ҳамма нарса эди, – дерди у онаси ҳақида. – У жуда ажойиб эди. У мен учун ҳаётда эришиш мумкин бўлган нарсаларнинг намунаси эди. У энг яхши нарсаларнинг юраги эди».

Китон, шунингдек, 2021 йилда кўп йил давом этган руҳий хасталикдан сўнг вафот этган акаси Рэндининг асосий васийси бўлган, деб ёзади Guardian.