Франциядаги сайлов натижалари маълум: Иккинчи турга Макрон ва Ле Пен ўтди

Бюллетенларнинг 97 фоизи ҳисоб-китоб қилинганидан кейин, Макрон биринчи турда 27,6 фоиз, унинг асосий рақиби Ле Пен - 27,41 фоиз овоз олгани маълум бўлди. Энди 24 апрель куни иккинчи тур бўлиб ўтади.

Сайловда жами 12 номзод иштирок этди. Учинчи ўринни 22 фоиз овоз билан сўллар номзоди, «Забт этилмаган Франция» партияси етакчиси Жан-Люк Меланшон эгаллаган. Меланшон тарафдорларини Ле Пенни қўлламасликка чақирди. «Иккинчи раундда бирорта овоз Ле Пенга берилмаслиги керак», деган у тарафдорларига мурожаатида.

Аввалги сайловларда ҳам биринчи турда учинчи бўлган Меланшон тарафдорларидан иккинчи турда икки номзодгаям овоз бермасликни сўраганди.

Биринчи турда бешинчи ўринда қолган (7 фоиз атрофида) республикачилар номзоди Валери Пекресс, «яшиллар» вакили Яник Жаддо, коммунист Фабьен Руссель ҳамда социалистлар номзоди, Париж шаҳри мэри Анн Идальго ўз тарафдорларини иккинчи турда Макронга овоз беришга чақирган.

Ўта ўнг сиёсатчи, 7,2 фоиз овоз олиб тўртинчи бўлган Эрик Земмур (кўплар уни Дональд Трамп билан қиёслашганди) иккинчи турда Ле Пенни қўллаб-қувватлашини билдирди.

Таҳлилчилар воқеаларнинг шундай ривожини тахмин қилишганди. Сайловдан олдинги сўровлар Макрон фаворитлигича қолаётгани, аммо у Ле Пенни атиги олти фоиз пунктга ортда қолдираётганини кўрсатганди.

2017 йилда бўлиб ўтган аввалги сайловларда ҳам Макрон ва Ле Пен иккинчи турда ўзаро рақиб бўлган. Ўшанда Макрон биринчи турда 24 фоиз овоз олган, Ле Пен — 21 фоиздан кўпроқ. Иккинчи турда Макронни сайловчиларнинг 66 фоизи қўллаган, унинг рақиби эса 34 фоиздан камроқ овоз тўплаган.

Макрон — Ғарб давлатлари етакчилари орасида Владимир Путин билан асосий музокарачи бўлди. 7 февраль куни у Москвага келиб Россия президенти билан учрашув ўтказди. Ундан олдин ва кейин ҳам Путин билан кўп марта телефон орқали мулоқот қилди. Таҳлилчилар Макрон Ангела Меркель Германия канцлерлигидан кетганидан кейин Европа етакчиси ролини эгаллашга уринаётганини тусмол қилишган.

Макрон Россияга қарши санкцияларни кучайтиришга чақирган. У Киев областидаги Буча шаҳрида тинч аҳоли вакиллари ўлдирилгани маълум бўлгач, қатъий позициясини эълон қилган. «Ҳарбий жиноятлар содир этилганининг аниқ белгилари бор. Россия армия [Бучадаги қотилликлар] учун жавобгар», деган Макрон. У санкциялар доирасида Россия кўмири ва нефт маҳсулотлари экспорти чекланиши зарурлигини қайд этган.

Ле Пен ҳам Украинага босқинни қоралаган, аммо санкциялар Европанинг ўзига таҳдид қилишидан огоҳлантирган. «Мен бир неча бор украин халқи билан бирдамлигимни изҳор этдим ва украиналик қочқинлар муносиб қабул қилиниши кераклигини айтдим», деган Ле Пен. Шу билан бирга, у Россияга қарши санкциялар Европада газ ва бошқа ресурслар нархи ошишига сабаб бўлишидан огоҳлантирган.

Марин Ле Пен 2017 йилдаги президентлик кампанияси даврида Путин билан учрашган. У ўшанда Россия президенти билан учрашиш учун Москвага борганди. Унинг «Миллий фронт» партияси (партиянинг эски номи) 2014 йилда Россия банкларидан биридан кредит олганди.