Франция президенти Эммануэл Макрон бепул платформалар ва генератив сунъий интеллектнинг (СИ) кинематография учун таҳдиди ҳақида сўзлар экан, агар СИ ижодкорларнинг ўрнини эгаллашга даъво қилса, бу улкан хато бўлишини айтди. У жанубий кореялик ҳамкасби Ли Чже Мён билан биргаликда «Люмер саммити» очилишида сўзга чиқди.
«Агар ҳисоблаш қудрати ижодий қудратга айланиши мумкинлигига ишонсак, даҳшатли хатога йўл қўйган бўламиз. У ижод саналган нарсага тақлид қилиши мумкин. Лекин у ҳеч қачон инсон ижодининг мутлақ ўзига хослигини ўрнини боса олмайди. Унда фақат бунинг кўриниши бор, холос», – деди Макрон.
Франция президентининг таъкидлашича, сунъий интеллект «бизга хос бўлган ҳиссиётни маълум маънода тақлид қилади, холос». У «ушбу сунъий интеллектни ижодкорлик хизматига қўйиш» вазифасини замонамизнинг яна бир чақириғи деб атади ва СИ технологиялари устидан «назоратни қайтаришга» даъват этди, бироқ аниқ чора-тадбирларни таклиф қилмади.
«Биз сунъий интеллект янада масъулиятли ва инсон манфаатларига кўпроқ урғу берган ҳолда ривожланадиган даврни бошлашимиз керак», – деб таъкидлади ўз навбатида Ли Чже Мён.
Февраль ойида Макрон видеоўйинлар ва сунъий интеллект сабабли ёшларнинг руҳий саломатлигига оид хавфларни ўрганишни таклиф қилган ва чекловлар бўлиши мумкинлигини истисно этмаган эди. Президент сўзларига кўра, чат-ботлар инсон хулқ-атвори ва ҳамдардлигига тақлид қилади, «дўстлардек мулоқот қилади» ва бу «салбий оқибатларга олиб келиши» ҳамда ёшларнинг «яккаланиб қолишини» кучайтириши мумкин.
Шунингдек, Франция етакчиси сунъий интеллект ёрдамида яратилган контентни «СИ томонидан яратилган» деган мажбурий белги билан тамғалашни таклиф қилган. «Буни амалга оширишга имкон берадиган Европа меъёрий ҳужжатлари бизда бор. Мен Еврокомиссиядан бу талабни қатъий сўрайман ва ундан чекинмайман», – деб таъкидлаган эди у ўшанда.
