Бўстонлиқда расмга тушмоқчи бўлган йигит шаршарадан йиқилиб тушди

Кеча, 2 май куни соат 15:00 да Тошкент вилояти Бўстонлиқ тумани Янги қўрғон қишлоғига табиат қўйнида дам олиш учун борган фуқаролардан бири “Сой мазор” шаршараси тепасига чиқиб, расмга тушмоқчи бўлган ва эҳтиётсизлиги оқибатида тепаликдан йиқилиб, ўнг оёғининг сон қисмини синдириб олган.

Фото: ФВВ матбуот хизмати

Бу ҳақда вилоят ФВБга хабар келиб тушган, ФВВ маълумотига кўра, воқеа жойига зудлик билан Бўстонлиқ тумани Чимён ёнғин-қутқарув отряди қутқарувчилари етиб бориб, жабрланган фуқарога биринчи тиббий ёрдам кўрсатган ва тепаликдан олиб тушиб, тез тиббий ёрдам ходимларига топширган.

Малакавий тиббий ёрдам кўрсатиш учун Бўстонлиқ тумани марказий шифохонасига юборилган.

“Ҳурматли дам олувчилар! Тоғли ҳудудларда ҳаракат қилганда эҳтиёткорлик чораларини кўришингизни сўраб қоламиз”, дейилади Фавқулодда вазиятлар вазирлиги ахборотида.