Тадбиркор Лев Гершензон «Яндекс.Новости»га муқобил лойиҳани ишга туширди. Ҳозирча бу The True Story янгиликлар агрегаторининг бета-версияси бўлиб, у ОАВ материалларидан сюжетларни тўплайди.
«Яндекс.Новости» янгиликлар агрегаторининг собиқ раҳбари, тадбиркор Лев Гершензон The True Story муқобил сервисининг бета-версиясини ишга туширди. Бу ҳақда у 22 август, душанба куни Facebook’даги саҳифасида маълум қилди.
«Бу бета-версия - яъни ҳар доим ҳам ҳамма нарса ишламайди ёки ҳамма нарса ҳам биз хоҳлагандек ишламайди. Биз янги функциялар қўшамиз, асосий алгоритмларни тузатамиз ва хатоларни тузатамиз», деб ёзади Гершензон.
Унга кўра, ОАВ материалларидан ташқари, ижтимоий тармоқлардаги постлар ва муайян воқеа билан боғлиқ ҳар қандай бошқа контент муайян мавзуларда жойлаштирилади.
«Бизнинг вазифамиз куннинг асосий воқеаларини кўрсатиш ва ҳар бир воқеа ҳақида қисқача маълумот тақдим этиш, воқеа ҳақида батафсил ёзадиган турли ОАВ материалларига ҳаволалар беришдир», деб тушунтирди тадбиркор.
Унинг таъкидлашича, янги лойиҳаси аллақачон дастлабки инвестицияларни жалб қилган - тахминий йиллик бюджетнинг деярли 5 фоизи топилган. The True Story жамоаси ҳозирда потенциал инвесторлар билан музокаралар олиб бормоқда.
«Бугунги тақдимот, умид қиламанки, бу ажойиб ҳикоянинг бошланиши. The True Story’ни ўқинг, таассуротларингиз билан ўртоқлашинг, яхшиланишларни таклиф қилинг. Таклиф қанчалик яхши ва конструктив бўлса, уни амалга ошириш эҳтимоли шунчалик юқори бўлади», деб ёзади Гершензон.
Эслатиб ўтамиз, март ойида, Россия томонидан Украинага қарши уруш бошланганидан кўп ўтмай, «Яндекс» бош директори Тигран Худавердянга қарши санкциялар жорий этилган эди. Бунда Гершензоннинг «Яндекс.Новости» россиялик фойдаланувчилардан содир бўлаётган воқеаларнинг тўлиқ тафсилотини яшираётгани ҳақидаги баёнотлари ҳам муҳим рол ўйнади.
