Маск Twitter раҳбари лавозимини тарк этиши учун овоз беришни сўради

Twitter’нинг янги эгаси, миллиардер Илон Маск ижтимоий тармоқ фойдаланувчиларини компаниядаги раҳбарлигига овоз беришда иштирок этишга таклиф қилди. «Twitter раҳбари лавозимини тарк этишим керакми?» - деб ёзди у 19 декабрь, якшанба куни ўз саҳифасида. Фойдаланувчиларда «ҳа» ёки «йўқ» деб жавоб бериш имконияти бор, Маск сўров натижаларига амал қилишга ваъда берди. 

Twitter’ни сотиб олганидан бери Илон Маск лавозимдаги қарорлари учун қаттиқ танқид қилинди. Бир неча ҳафта олдин қабул қилинган сўнгги шов-шувли қарор қатор етакчи нашрлар журналистларининг аккаунтларини блоклаш, шунингдек, украиналик фойдаланувчиларни ижтимоий тармоқдан фойдаланиш учун саҳифаларига киришни мобил телефон рақами ёрдамида тиклаш имкониятидан маҳрум қилиш бўлди. Кейинчалик Маск бир нечта журналистларнинг аккаунтларини блокдан чиқаришга розилик берди.

Октябрь ойи охирида компания эгаси бўлганидан сўнг тадбиркор компания жуда кўп маблағ сарфлаётганини айтди ва ходимларнинг ярмига яқинини ишдан бўшатди. Қолганлар учун у қўшимча ишлашни таклиф қилди ва Сан-Францискодаги офисга каравотлар қўйди. Бундан ташқари, Маск компания ишни бажариш учун яқин келажакда «кўп аҳмоқона ишлар» қилиши ҳақида огоҳлантирди. Танқидчилар Маскнинг номақбул контент учун текширувни кескин қисқартирганидан хавотирда. Уларнинг фикрига кўра, бу платформага дезинформация ва нафратнинг кўпайиши билан таҳдид қилмоқда. Германияда сиёсатчилар Twitter'ни тарк этишга қарор қилишди.