5 январ куни Россия президенти Владимир Путин мамлакат мудофаа вазири Сергей Шойгуга 36 соат давомида Украинадаги урушда ўт очиш режимини тўхтатишга буйруқ берди. 6 январ кун ярмидан 7 январ ярим тунгача давом этиши айтилган режим гўёки Рождество муносабати билан эълон қилинган «эзгулик қадами» экани айтилди.

    Путиннинг айтишича, бу қарорни мамлакат бош руҳонийси Патриарх Кириллнинг илтимоси билан қабул қилган. Путин православлар байрам қиладиган Рождество куни украиналиклар черковларга бемалол бориши учун шундай қарорга келганини иддао қилди.

    Путиннинг бу чиқиши чиндан украиналикларга яхшилик қилиш учун экани ва унинг гаплари самимий бўлганига кўпчилик ишонгани йўқ. Чунки Путиннинг ўзи уруш бошланишидан бир неча кун аввал ҳам Россия Украинага бостириб кирмаслигини айтганди. Шу боис халқаро майдонда унинг ўзига хос «Рождество сулҳи» эълон қилгани ҳам урушга боғлиқ ҳийла бўлиши мумкин деб қаралди. Путин «Рождество ярашуви» эълон қилиши аввалроқ маълум бўлганди. Патриарх Кирилл бу ҳақда гапирганда кўпчилик орқасидан Путин чиқиб гўёки «эзгулик қадами» сифатида (худди рус аскарлари Илонли оролини ташлаб кетгани каби) «Рождество сулҳи» эълон қилишини тахмин қилганди. Бу баёнотидан аввал Путин Туркия президенти Эрдўған билан телефонда гаплашган ва туркиялик ҳамкасби Путинга «бир томонлама сулҳ» эълон қилиш таклифини берганди.

    Украина кескин жавоб қайтарди

    Киев Путин бу «ярашув» ҳақида эълон қилишидан аввал бу борада гап бўлиши мумкинлигини маълум қилганди. Кириллнинг баёнотидан кейин Украина президент девони раҳбари маслаҳатчиси Михаил Подоляк бу Россия томонидан қўйиладиган тузоқ ва навбатдаги пропаганда воситаси эканини айтганди.

    Путиннинг баёнотидан кейин ҳам айнан Подоляк биринчи бўлиб расмий Киевнинг позициясини маълум қилди: «Биринчидан, Украина Россия каби бировнинг ерини босиб олгани йўқ ва Россия каби оддий фуқароларни ўлдирмаяпти. Украина ўз ҳудудига келган босқинчи армия вакилларини ўлдирмоқда. Иккинчидан, Россия босиб олган ҳудудларни тарк этишни бошласа, ана шу «вақтинча ярашув»нинг бошланиши бўлади. Иккиюзламачилигингиз ўзингизга сийлов», деб ёзди Подоляк ўзининг Тwitter саҳифасида.

    Кейинроқ Украина Хавфсизлик ва мудофаа кенгаши раиси Алексей Данилов чиқиш қилиб, ҳеч қандай ярашув ҳақида гап бўлиши мумкин эмаслигини айтди: «Келинг, бўладиган гапни гаплашайлик, улар кимга сулҳ таклиф қилишмоқда? Ўзларигами? Ҳеч қанақа келишув бўлмайди. Ана у поп (Кирилл назарда тутилмоқда. – тарж.) уларга бир сана ўйлаб топди, бу бизга алоқадор эмас. Бу бизнинг еримиз ва бу ерда тўғри деб билган ишимизни қиламиз. Сиз яхшиси кўч-кўронингизни йиғиштириб, туёғингизни шиқиллатинг», деди Данилов.