Президент Шавкат Мирзиёевнинг топшириғига мувофиқ, Туркияга Фавқулодда вазиятлар вазирлигининг бир гуруҳ қутқарувчилари жўнатилади.
Қайд этилишича, улар табиий офат оқибатларини бартараф этишда иштирок этиши мўлжалланган.
Шунингдек, рўй берган кучли зилзиладан жабр кўрганларга гуманитар ёрдам ҳам жўнатилиши режалаштирилган.
6 февраль куни Туркия жануби-шарқида ва Сурия шимолида юз берган кучли зилзила оқибатида камида икки мамлакатда мингдан ортиқ киши ҳалок бўлди.
Туркия президенти Ражаб Эрдўған мамлакатда зилзила қурбонлари сони 912 нафарга етгани, 5,4 минг киши жабрланганини маълум қилди. 2,8 минг бино вайрон бўлган.
Зилзила кучи 7,7 баллни ташкил этган, бу Туркияда 1939 йилдан буён рўй берган энг кучли ер силкиниши бўлди.
