НАТО Украинага урушдан кейинги хавфсизлик механизмларини ваъда қилди

Украина келажаги Евроатлантика оиласида ва бу давлат учун узоқ муддатли хавфсизлик механизмларини яратиш зарур, деди НАТО бош котиби Украина ташқи ишлар вазирлиги раҳбари билан учрашувдан кейин.

Фото: AP

Украинани Россия тажовузкорлигининг эҳтимолий такрорланишидан ҳимоя қилиш зарур, деди НАТО бош котиби Йенс Столтенберг 21 февраль, сешанба куни Европа Иттифоқи дипломати Жозеп Боррел ва Украина ташқи ишлар вазири Дмитрий Кулеба билан бўлиб ўтган қўшма матбуот анжуманида.

«Уруш тугагач, биз Украина учун узоқ муддатли хавфсизлик механизмларини яратишимиз керак, - деди Столтенберг. - Биз кўп йиллар давомида Россия агрессиясининг намунасини кўриб турибмиз». У 2008 йилда Грузиядаги уруш, 2014 йилда Қримнинг аннексия қилиниши ва Украина шарқидаги уруш, сўнгра Россиянинг мамлакатга кенг кўламли босқинини мисол қилиб келтирди.

«Биз Украинанинг келажаги Евроатлантика оиласида эканлигини аниқ айтишимиз ва Россия Европа хавфсизлигига путур етказишда давом этмаслигини таъминлашимиз керак. Биз Россия агрессиясининг аёвсиз доирасини бузишимиз керак», - дея таъкидлади НАТО бош котиби.

Унинг сўзларига кўра, Россиянинг сулҳга тайёрлигини ҳеч нарса кўрсатмаяпти, аксинча, унинг президенти Владимир Путин янги ҳужум амалиётларини тайёрламоқда, янги аскарларни сафарбар қилмоқда, фронтга кўпроқ қурол юбориб, Шимолий Корея ва Эрондан ҳарбий ёрдам сўрамоқда.

«Биз Хитой Россияга қурол билан ёрдам кўрсатишни режалаштираётганидан хавотирдамиз», — деди Столтенберг. Бироқ, Боррелнинг сўзларига кўра, Пекин уни Хитой сиёсати - уришаётган мамлакатларга қурол етказиб бермаслик эканига ишонтирган.