Россиянинг Донецкда қулаган самолёти, Бахмутда қолаётган украин аскарлари. Уруш суратлари

Украинада урушнинг 373-куни ўтди. Асосий маълумотлар:

• Россия Мелитополни Запорижжя областининг аннексия қилинган қисми пойтахти деб эълон қилди.
• АҚШ Украинага 400 миллион доллар миқдорида янги ҳарбий ёрдам пакетини эълон қилди.
• «Вагнер» хусусий ҳарбий компанияси раҳбари Евгений Пригожин Бахмут «амалда қуршаб олингани»ни айтди ва Украина қўмондонлигидан шаҳардаги қўшинларини олиб кетишни сўради.
• Донецк областининг РФ назоратидаги Енакиево шаҳри яқинида россияликларнинг Су-34 самолёти қулади.
• Reuters маълумотига кўра, Россия «Шимолий оқим» тизимининг шикастланган газ қувурлари ишини тўхтатиб қўймоқчи.
• Путин ҳарбий ҳолат даврида давлат мудофаа буюртмаларини бажармайдиган компанияларда ташқи бошқарув жорий этиш тўғрисидаги фармонини имзолади.
• Евроиттифоқ санкцияларига учраган «Тинькофф» банки уруш даврида ўн минглаб россияликлар кетган Грузияга валюта юборишни тўхтатди.
• Украинада суд россиялик учувчини Харкив бўйлаб авиазарбалар бергани учун 12 йил муддатга озодликдан маҳрум этди.

Кун кадри. Россияликларнинг уриб туширилган Су-34 самолёти

Бахмут мудофааси

Украина қуролли кучлари Бош штабига кўра, россияликлар Бахмутга қуршаб олиш ҳаракатларини тўхтатмаяпти. Сўнгги бир кунда украин кучлари Бахмутнинг ўзида, шунингдек Васюковка ва Дубово-Василевка қишлоқларида рақибнинг «кўп сонли» ҳужумларини қайтарган. «Вагнер» ХҲК Хромово посёлкасига яқин келиб, шимолда Богдановка ва Часив Яр йўналишларида илгарилаш орқали, амалда Бахмутдаги украин кучлари таъминотини кесиб қўйган, Бахмутдаги бўлинмалар яқин вақтлар ичида ҳозирча хавфсиз бўлиб турган йўллар орқали чекиниши кутилмоқда.

Яраланган украин аскарлари эвакуацияси 

Запорижжяда харобаларни тозалаш жараёни

2 мартга ўтар кечаси Россия қўшини Запорижжя шаҳрига ракета зарбаси йўллади. Дастлабки маълумотларга кўра, Запорижжя С-300 зенит-ракета тизимлари орқали ўққа тутилган. Ракеталардан бири беш қаватли турар жойга келиб тушган, натижада 10 квартира вайрон бўлган. Ракета зарбаси қурбонлари сони 10 кишини ташкил этмоқда.