Ўзбекистон Қозоғистонга маҳкумларни ташишга мўлжалланган махсус вагонлар юборди

Ўзбекистонда янги ишлаб чиқарилган махсус вагонлар Қозоғистонга юборилди. Бу ҳақда «Ўзбекистон темирйўллари» хабар бермоқда.

Буюртма бўйича «Тошкент йўловчи вагонларни қуриш ва таъмирлаш заводи» акциядорлик жамияти томонидан ишлаб чиқарилган 8 дона 61-942 русумидаги махсус контингентларни ташиш учун мўлжалланган янги махсус вагонлар МДҲ давлатлари темирйўлларида фойдаланиш учун мўлжалланган.

Мазкур вагонлар ТР ТС 001/2011 техник регламентининг барча талабларига тўлиқ жавоб беради ҳамда мувофиқлик сертификатига эга. Қозоғистон Миллий гвардияси техник шартларига асосан «Тошкент йўловчи вагонларни қуриш ва таъмирлаш заводи» раҳбарияти бошчилигида ҳамда етакчи мутахассислар норматив ҳужжатларига асосланган лойиҳалари бўйича ишлаб чиқарилган махсус вагонлар Остона шаҳрига етказиб берилди ва буюртмачига топширилди.

Таъкидланишича, вагонлар дизайни ўзига хос бўлиб, қўшимча замонавий жиҳозларни ўз ичига олади. Ҳавони мўътадиллаштириш тизими, ичимлик суви ва ҳавони дезинфекциялаш ускунаси, экологик тоза биоҳожатхона, видеокузатув мосламаси, эшиклар ҳолати тўғрисида сигнал берувчи қурилма ва бошқалар ўрнатилган.

Маълум қилинишича, икки давлат ўзаро алоқаларини янада ривожлантириш мақсадида янги махсус вагонларини ишлаб чиқариш лойиҳалари ҳам кўриб чиқиляпти.