ЖАР Халқаро жиноий суддан чиқиш режаларини рад этди

Аввалроқ мамлакат ХЖСдан чиқиш ниятини эълон қилган Жанубий Африка Республикаси президенти Сирил Рамапоса маъмурияти ҳукмрон партиянинг изоҳидаги хатога ишора қилди.

Фото: Marina Riera/Human Rights Watch

Жанубий Африка Республикаси (ЖАР) президент Сирил Рамапосанинг сўзларига зид равишда Халқаро жиноий суддан (ХЖС) чиқишни режалаштирмаяпти. Бу ҳақда, AFP хабарига кўра, 25 апрел, сешанба куни давлат раҳбари маъмуриятида маълум қилинган. ЖАР Рим статутининг "имзоловчиси бўлиб қолмоқда" ва "халқаро ҳуқуқнинг тенг ва изчил қўлланиши учун кампанияни давом эттиради", дея ишонтирди маъмурият ҳамда Рамапоса ҳукмрон "Африка миллий конгресси" (АМК) партиясининг позициясини нотўғри маъқуллаганини қўшимча қилиб ўтди.

Бир кун аввал Финландия президенти Саули Ниинистё билан биргаликда ўтказилган матбуот анжуманида сўзга чиққан Сирил Рамапоса АМК мамлакатнинг ХЖСдан чиқиш нияти ҳақида қарор қабул қилганини айтди. Унинг сўзларига кўра, суд баъзи давлатларга нисбатан адолатсиз муносабат кўрсатгани учун қарор қабул қилинган. "Биз адолатсиз муносабат масаласи тўғри муҳокама қилинишини истардик, аммо ҳозирча ҳукмрон партия иштирок этишдан бош тортиш керак деган қарорга келди", деди Рамапоса ўз нутқида.

AFP хабарига кўра, “Африка миллий конгресси” ижроия қўмитасининг ХЖС юрисдикциясидан чиқиш эҳтимолини муҳокама қилган йиғилиши 24 апрел куни якунига етди. 25 апрел оқшомида АМК қўмита “тенг бўлмаган ХЖС қонунларининг танлаб қўлланиш”ни муҳокама қилганини айтди. Шу тариқа, “таассурот пайдо бўлиши мумкинки, ХЖСдан зудлик билан чиқиш тўғрисида қатъий қарор қабул қилинган. Бундай эмас”, — дея қўшимча қилди ЖАР маъмурияти.