«Реал» Жиронадаги фиаскодан кейин аламини «Алмерия»дан олди, қаторасига уч турда гол ура олмаган Бензема бу ўйиннинг биринчи бўлимидаёқ ҳет-трик расмийлаштирди. Француз ҳужумчиси биринчи ва иккинчи голларни Винисиус Жуниор ва Родригонинг қанотдан узатмалари эвазига урди, бўлим охирида эса Лукас Васкес ишлаган пеналтини аниқ ижро этди.
Шундай қилиб «Олтин тўп» соҳиби чемпионатдаги голлари сонини 236 тага етказиб, ла лига тўпурарлари рўйхатида тўртинчи ўринга кўтарилди. У Мадрид жамоасининг 80-йиллардаги афсонаси — мексикалик Уго Санчесни ортда қолдирди. Олдинда — Сарра (253), Криштиану Роналду (311) ва Месси (473). Бензема шу суръатда давом этса, «Атлетик»нинг ўтган аср ўрталаридаги юлдузини ортда қолдириши тайин. Карим Сарра билан орадаги фарқни шу ўйиндаёқ қисқартириши мумкин эди, аммо иккинчи бўлимда VAR аралашувидан кейин Бензема томонидан ҳужумда фол қайд этилиб, бош ҳакам белгилаган пеналти бекор қилинди, унинг сўнгги дақиқалардаги зарбаси эса дарвоза устунига тегди.
Бу ўйинда Винисиус ҳам алоҳида эътиборга лойиқ ўйин кўрсатди. Бир томондан, бразилиялик футболчи яна ҳиссиётларини тийиб тура олмади ва унга сариқ карточка кўрсатилди. Агар арбитр унинг сарказм билан йўллаган олқишини эътиборсиз қолдирмаганида, у майдондан четлатилиши ҳам мумкин эди. Аммо ҳакамлар юлдуз футболчиларни аяшади, Винининг мақомини эса унинг статистикаси ҳам тасдиқлайди: ушбу ёш бразилиялик қаторасига иккинчи йил барча турнирлар ҳисобга олинган ҳолда гол+пас тизимида 20 талик нуқтани забт этди (20 гол ва 20 голли узатма).
«Барселона» ҳам ҳафта ўрталаридаги айбини ювди, бу ўйиндаги кучли стартни ҳимоячилар таъминлашди. Сафга эндигина қайтган Кристенсен Рафинянинг ўнг қанотдан берган узатмасини боши билан дарвозага жойлаб, каталонияликлар сафидаги илк голини нишонлади, «Райо Вальекано»га қарши ўйинда муваффақиятсиз ўйнаган Кунде эса Левандовскига идеал даражадаги пас узатди. Бу билан полшалик ҳужумчига турнир тўпурарлари рўйхатида яна Бенземадан олдинга чиқиб олишда ёрдам берди.
«Бетис» эса муаммолар гирдобида қолди, жамоада ўйин бошланишидан ҳам муаммолар етарли эди. Мануэл Пеллегрини бу ўйинда Фекир ва Каналес каби етакчиларига таяна олмасди, зарбдор форвард Борха Иглесиас жароҳат олганди, «Барса»нинг биринчи голи арафасида эса марказий ҳимоячи Луиз Фелипе ҳам сафдан чиқди.
Уни алмаштирган Эдгар Гонсалес эса жуда ёмон ўйин кўрсатиб, тўққиз дақиқа ичида икки бор сариқ карточка олди. Меҳмонларни VAR аямади, бош ҳакам аввалига Рафинянинг голини офсайд туфайли бекор қилганди, видеотакрор аралашувидан кейин эса ҳисоб 3:0 кўринишига келди. Яшил-оқлар мухлислари учун бу ўйиндаги ягона ижобий лаҳза 41 ёшли Хоакиннинг захирадан тушиши бўлганди. Яқинда мавсум охирида футболчилик фаолиятини якунлашини эълон қилган ушбу фахрий футболчини кўк-анорранглилар жамоаси мухлислари ҳам олқишлашди.
Аммо ўйин охирларида уни яна олқишлар остида кузатиб қўйишга тўғри келди - у жароҳат олиб майдонни тарк этди, барча алмаштиришлардан фойдаланиб бўлингани туфайли қолган вақтда меҳмонлар 9 киши бўлиб ўйнашига тўғри келди. Агар футболчининг жароҳати жиддий бўлиб чиқса, у Испания чемпионатида 622 ўйин ўтказган «Барселона» собиқ дарвозабони Субисарретанинг рекордини янгилай олмайди. Бу натижага эришиш учун «Бетис» ҳавбеки қолган барча тур ўйинларида майдонга тушиши талаб этилади.
Аммо, бу оқшом «Камп Ноу» бўлажак юлдузнинг илк ўйинига гувоҳ бўлган бўлиши мумкин — Ламин Ямал. У жамоанинг Испания чемпионатидаги энг ёш дебютантига айланди. 15 ёшли болакай ўйин охирида илк голини уриши ҳам мумкин эди, аммо унинг зарбаси дарвозабон томонидан тўсилди, у шунингдек январ ойидан буён ўйнамаган Дембеле учун қулай вазият яратиб берди.
«Ювентус»га ўн беш очкоси қайтариб берилиши шунга олиб келдики, ўзини қулай ҳис қилиб турган «Рома» ва «Милан»нинг ўзаро ўйини ҳақиқий жангга айланди. Ўйиндаги деярли ҳар бир эпизодда кескинлик кўриниб турди.
Бу ўйин вақтига ҳам таъсир кўрсатди, биринчи бўлим 50 дақиқа давом этди, иккинчи бўлим кечикиб бошланди. Жамоалар ўйинни давом эттиришга ҳозирлик кўраётганида Белоттини алмаштириш талаб этилиши маълум бўлди. Ўйиннинг охирги қисми эса январ ойида «Сан-Сиро»да кузатилган триллерни ҳам сояда қолдирди. Ўшанда яхшироқ ўйнаган «Милан» сўнгги дақиқаларда икки гол ўтказиб юборган (2:2) ва инқироз кўчасига кириб қолганди.
Ўша ўйинда «Рома»га дурангни Абраҳамнинг голи олиб келганди, инглиз ҳужумчиси шанба оқшомида ҳам қўшиб берилган учинчи дақиқада тўпни дарвоза тўрига жойлади. Аммо Стефано Пиоли барибир қасос олди, ўйинга қўшиб берилган охирги дақиқада Рафаэла Леау ўз қанотидан тўпни Салемакерснинг оёғига узатиб берди. Ғалабани нишонлашга тайёр бўлиб турган Жозе Моуриньо ва унинг жамоаси ҳамон бешинчи ўринда қолмоқда.
Германия: Леверкузен омили
Лейпциг – Ҳоффенҳайм 1:0
Гол: 1:0 – 28 Нкунку.
Унион – Байер 0:0
Кёлн – Фрайбург 0:1
Гол: 0:1 – 54 Доан.
Бундеслигада энг қизиғи якшанба куни бошланади, чунки жума куни Боҳумда очко йўқотган Дортмунднинг «Боруссия» клуби (1:1) «Бавария»га биринчи ўринга қайтиш имконини берди. Шанба кунги барча интригалар эса ЕЧЛга икки йўлланма учун курашаётган уч даъвогарнинг сиртқи кураши билан боғлиқ эди.
«Байер» асосий еврокубок йўлланмаси учун курашмаяпти, аммо 14 ўйиндан иборат мағлубиятсиз серия қайд этган леверкузенликлар бошқаларнинг асабига ўйнамоқда. Бир тур аввал Хаби Алонсо шогирдлари «Лейпциг»ни мағлуб этганди, энди эса «Унион»ни икки очкодан маҳрум этди. Натижада учинчи ўринда қолган берлинликлар фақат тўплар нисбатига кўра «Фрайбург»дан олдинда жойлашган, бу жамоа бир мавсумда тўпланган очколари сони бўйича ўз рекордини ўрнатиб бўлди (56). Кёлнда бу жамоага бурчак зарбасидан тўпни узоқ устун олдидаги Доэнга етказиб берган Ҳелер ғалаба келтирди.
«Лейпциг» эса ҳамон кучли тўртлик учун пойгадаги аутсайдер бўлиб қолмоқда. Охирги турларда йўқотишларга учраган жамоанинг «Ҳоффенҳайм» билан ўйиндаги ғалабаси Нкунку жамоа учун нақадар муҳимлигини кўрсатиб берди. Ўтган мавсумнинг энг яхши футболчиси бу мавсумда жароҳатлардан азият чекмоқда, унинг шанба кунги голи — ноябр ойидан буён биринчиси бўлди, ўшанда француз мавсумдаги икки жароҳатидан биринчисини олганди, бу эса унинг ЖЧ-2022 турниридан қолиб кетишига сабаб бўлганди.
Кун статистикаси
«Райо Вальекано» пешқадам «Барселона»ни енганидан (2:1) уч кун ўтиб сўнгги ўриндаги «Элче»га йирик ҳисобда мағлуб бўлди (0:4).
Шанба куни «Вест Ҳэм» «Кристал Пэлас»га қарши ўйинда (3:4) бурчак жарима зарбасидан кейин 3 гол урди. Англия чемпионатида бунақаси 2019 йил мартидан буён кузатилмаганди.
«Брентфорд» ҳужумчиси Тоуни топ-5 лигаларда камида 20 гол урган 7-футболчи бўлди. Бунгача бу натижа Ҳоланд («Манчестер Сити»), Кейн («Тоттенҳэм»), Осимҳен («Наполи»), Мбаппе («ПСЖ»), Дэвид («Лилл») ва Ляказетт («Лион») томонидан забт этилганди.
«Штутгарт» бош мураббийликка Себастьян Ҳенесс тайинланганидан буён 8 очко жамғарди. У тўрт ўйинда мағлубиятга учрамасдан, ўзидан олдинги мураббий Бруно Лаббадия 13 турда тўплаган очколардан кўпроқ очко жамғарган.
Франция чемпионатининг жорий мавсумида «Лилл» яримҳимоячиси Кабелла 9 гол урди. Бу унинг шахсий рекорди.
«Брайтон» футболчилари дастлабки ўн беш дақиқаликда 12 гол уришган, бу АПЛдаги энг яхши кўрсаткич.
