Маскнинг мия чиплари ишлаб чиқаётган Neuralink компанияси 5 млрд долларга баҳоланди

Мияга жойлаштириш учун чиплар ишлаб чиқарувчи Илон Маск асос солган Neuralink компаниясининг қиймати 5 миллиард долларга етди, деб хабар қилди Reuters. Икки йил аввал стартап 2 миллиард долларга баҳоланган эди, бироқ Neuralink АҚШ ҳукумати унинг технологиясини одамларда синовдан ўтказишни маъқуллаганини эълон қилгунга қадар бу маблағ бир нечта шахсий транзакциялар туфайли ўсди.

Фото: AP

Илон Маск асос солган, мияга жойлаштириш учун чиплар яратувчи Neuralink стартапи қиймати қарийб 5 миллиард долларга етди, деб ёзади Reuters беш хабардор манбага таяниб.

Ушбу қиймат компания АҚШ регуляторлари унинг технологиясини одамлар томонидан синовдан ўтказишни маъқуллаганини маълум қилишидан олдин, Neuralink акциялари бўйича сўнгги бир неча ой ичида амалга оширилган шахсий битимларга асосланади. Маскнинг стартапи икки йил аввал хусусий инвестициялар раундида деярли 2 миллиард долларга баҳоланган эди, дея қайд этади Reuters.

Синовлар тасдиқлангач, Neuralink инвесторларга компаниянинг қимматли қоғозларини 7 миллиард долларга, яъни ҳар бир акция учун 55 долларга сотиб олишни таклиф қилди, деб ёзади агентлик ўз қўлига тушган электрон хатга таяниб. Бироқ, Reuters агентлиги инвесторларнинг бирортаси Neuralink акцияларини бундай шартлар асосида сотиб олишга рози бўлган ёки бўлмаганлигини аниқлай олмади.

26 май куни Neuralink АҚШ озиқ-овқат ва фармацевтика идорасидан (FDA) ўзининг биринчи клиник синовини ўтказиш учун рухсат олганини эълон қилди. Компания клиник синовлар учун кўнгиллиларни жалб қилиш жараёни ҳали бошланмаганини таъкидлади.