АҚШ президентининг миллий хавфсизлик бўйича маслаҳатчиси сўзларига кўра, Жо Байден Туркиянинг қирувчи самолётларини қабул қилиши АҚШ ва НАТО манфаатларига мос келишига ишончи комил.
АҚШ президенти Жо Байден Туркияга F-16 қирувчи самолётларини сотишни кафолатламоқчи. Бу ҳақда 11 июль, сешанба куни Вилнюсдаги матбуот анжуманида Америка етакчисининг миллий хавфсизлик бўйича маслаҳатчиси Жейк Салливан маълум қилди. Унинг сўзларига кўра, Байден Туркия томонидан қирувчи самолётлар олиниши ҳам АҚШ, ҳам НАТОнинг манфаатларига мос келишига ишончи комил. «У Конгресс билан маслаҳатлашган ҳолда буни олға силжитиш ниятида», - дея Салливан сўзларини келтирган dpa.
Вилнюсдаги НАТО саммити олдидан ўтказилган матбуот анжуманида Байден маслаҳатчисидан АҚШ томонидан Туркиянинг F-16 паркини модернизация қилиш Туркия президенти Ражаб Тоййиб Эрдўғаннинг Швециянинг НАТОга қўшилиши бўйича блокадасини олиб ташлашга ёрдам берадими, деб сўралди. Илгари АҚШ ҳукумати бундай алоқа мавжудлигини инкор этган, бироқ Байденнинг ўзи икки марта ушбу масалаларни ўзаро боғлиқ деб атади. Салливаннинг сўзларига кўра, АҚШ президенти ҳеч қачон таклиф қилинаётган сотув бўйича шартларни илгари сурмаган.
Битим амалга ошиши учун АҚШ ҳукумати қурол савдоси ҳақида Конгрессни расман хабардор қилиши керак. Қонун чиқарувчилар битимни блоклаш имкониятига эга. Бир қатор конгрессменлар Туркия Швециянинг НАТОга киришига тўсиқ қўйишда давом этса, қирувчи самолётлар сотилишига йўл қўймасликларини очиқ айтган. Энди Эрдўған Стокҳолмнинг альянсга қўшилиши бўйича ўз позициясидан воз кечгач, тез орада қурол-яроғ бўйича келишув амалга ошиши мумкин.
