Тошкентдаги кенг кўламли антикриминал рейдларга “ойлаб ва йиллаб” тайёргарлик кўрилган, дея маълум қилди Дониёр Тошхўжаев. Унинг айтишича, бу тадбирларнинг “Ҳумо арена”даги тартибсизликка ҳам, қўшни давлатлардаги шунга ўхшаш рейдларга ҳам алоқаси йўқ. Тошхўжаев ушланганларнинг давлат хизматчилари билан алоқаси бор-йўқлиги ва айбсизлик презумпцияси ҳақидаги саволларга ҳам жавоб берди.
Тошкент шаҳрида 27 ноябрдан бошланган жиноятчиликка қарши тезкор тадбирларга узоқ вақт давомида тайёргарлик кўрилган, қўлга олинган шахслар муайян муддат кузатувда бўлган. Бу ҳақда пойтахт ИИББ бошлиғининг биринчи ўринбосари Дониёр Тошхўжаев 12 декабр кунги матбуот анжуманида айтиб ўтди.
“Уюшган жиноий гуруҳ билан 1–2 кунда ёки 1–1,5 ойда масалани ҳал қилиб бўлмайди. Улар билан курашиш учун ойлар, керак бўлса йиллар керак. Яъни биз ўзимизнинг меъёрий ҳужжатларимиз, буйруқ талабларимиз, қонунларимизга асосан, уларни кузатувга оламиз. Қилаётган ишларининг ҳар бирини фиксация қилиб, вақт-соати келганда чорасини кўрамиз”, – деди у.
Тошхўжаевга кўра, тергов органи қўлга олинганларнинг айбини исботлаш учун етарли далиллар тўплаганига ишонч ҳосил қилганидан кейин уларни қўлга олиш бошланган.
“Мен сизларга ишонтириб айта оламан, бу кеча бошланган нарса эмас. “Долзарб 40 кун”га ҳам алоқаси йўқ. Йиллар давомида ишловга олиниб, вақт-соати шу кунга тўғри келган. [...] Биз ҳаммасига керакли ва етарли далиллар топгандан кейин, эртага жабрланувчини қўрқитиб ёки қанақадир бошқа таъсир чораларини кўриб очиқда қолиб кетмаслигига кўзимиз етганидан кейин, бу тадбирларни амалга оширяпмиз.
Бугун фамилиялари тилга олинган (Бахтиёр Қудратуллаев ва Саидазиз Саидалиев – таҳр.) асосий шахслар уюшган гуруҳ таркибида ҳаракатланган деб қўрқмасдан айта оламиз. Сабаби кеча терговчилар томонидан қўшимча йиғилган далилларга асосан бир қатор шахсларга уюшган жиноятчилик деб айб эълон қилинди”, – деди ИИББ масъули.
Тошхўжаев бу тадбирларнинг 25 ноябр куни “Ҳумо арена”да рэпер Jah Khalib'нинг концертига киришдаги тартибсизликка алоқаси йўқлигини айтди.
“Бу воқеаларнинг умуман алоқаси йўқ. Ижтимоий тармоқларда мен ҳам ўқидим, гўёки уюшган гуруҳлар 6-7 та Миллий гвардия ходимларига пичоқлар билан жароҳат етказган. Бу ҳақиқатга умуман тўғри келмайдиган нарса.
Шахсан ўзим ҳам ўша куни “Ҳумо арена”да эдим. У ерда тартибсизлик бўлди дейиш ҳам сал нотўғри бўлади. Электрон чипталар билан шуғулланадиган шахсларга тавсиялар беришимиз керак экан. Ҳозир бу ҳолат бўйича жиноят иши қўзғатилган ва тергов ўзи баҳо бериб, тавсияларини беради. Лекин ҳозирги кунда айта оламан, чипталарнинг ҳимояси ўйланиши керак экан. Яъни мен электрон чипта сотиб олганимдан кейин уни бирга бир сизнинг Telegram'ингизга жўнатишим мумкин экан. Яъни мен [турникетдан] ўтганимдан кейин, сиз келасиз-да, ўтишга ҳаракат қиласиз, лекин турникет бу чипта ишлатилди деб кўрсатади. Сиз кейни турникетнинг олдида турган волонтёрга исботлашга ҳаракат қиласиз: “Бу ўзимнинг чиптам, нега унда сотдиларинг”, деб тўполонни бошлайсиз. Бу жараёнда орқада ҳақиқий чипталар билан келган шахслар ҳам йиғилиб қолган.
Одамлар йиғилиб-йиғилиб бораверган, бу пайтда концерт бошланиб қолган. Ёшларимиз эса тезроқ концертга киргиси келади. Мана шу ерда сал шунақа муаммо бўлиб қолди. Одамлар кўпайиб кетганидан кейиб бош бошқарма бошлиғимиз генерал майор Азиз Анварович дарҳол етиб келдилар. Муаммонинг ечими сифатида барча турникетлар очиб юборилди. Тошкент шаҳридаги барча тиббиёт муассасаларини кўтаришинглар мумкин, бу воқеада фақат битта шахс оёғининг сонидан лат егани бўйича мурожаат қилди”, – дея ижтимоий тармоқларда тарқалган ўлим ва пичоқбозлик ҳақидаги хабарлар асоссиз эканини таъкидлади Дониёр Тошхўжаев.
У, шунингдек, жиноятчиликка қарши кенг кўламли рейдлар (27 ноябрдан буён пойтахтда 103 киши қўлга олиниб, 38та жиноят иши очилган) қўшни Қирғизистон ва Қозоғистондаги шунга ўхшаш рейдлар билан боғлиқ бўлиши мумкин деган тахминларни ҳам рад этди.
“Мен [шу йил] 22 августда лавозимга тайинландим. Бундан олдин Тошкент вилоятида бир ярим йилча ишладим, ундан олдин Фарғона вилоятида ишлаганман. Мен лавозимга тайинланганимдан кейин бу ернинг жилдлари билан танишиб чиққанман. Яъни мендан олдингилар ҳам бу ишларни бошлаган, кимдир давом эттирган, якуни менга келиб тўхтаб қолди. Бу Қирғизистондаги ёки бошқа қанақадир воқеалар билан битта вақтга, 27 ноябрга тўғри келиб қолди. Бошқа давлатлар билан ҳеч қанақа келишув ҳам йўқ. Ёки улардан кўриб биз қилаётганимиз йўқ. Бизнинг ўзимизнинг ишимиз, уларнинг ўзининг иши”, – дея қайд этди ИИББ масъули.
Матбуот анжуманида Дониёр Тошхўжаевдан қўлга олинганларнинг давлат мансабдорлари билан алоқалари бор-йўқлиги ҳақида сўралди.
“Ҳозир менда бунақа маълумотлар йўқ. Дастлабки тергов жараёнида агар сиз айтаётган масалалар кўтариладиган бўлса, жиноят ишини ёки жиноят ишининг бир қисмини прокурата идораларига бериб юборишга мажбур бўламиз. Сиз айтаётган моддалар бўйича дастлабки тергов ҳаракатларини олиб боришга прокуратура идоралари масъул”, – дея жавоб берди у.
Дониёр Тошхўжаев қўлга олинаётган шахсларнинг суратлари ИИББ томонидан юзлари беркитилмаган ҳолда эълон қилинаётгани айбсизлик презумпциясига зид эмасми, деган саволга ҳам жавоб берди.
“Бу ҳолатда биз қўрқмасдан уларнинг юзларини очиқ ҳолда қўйганимиз сабаби – буларнинг ҳаракатларидан жабрланган инсонлар кўп. Биз айнан шу инсонларга мурожаат қилиб: “Қўрқманглар, Ўзбекистонда қонун устувор, жазо муқаррар. Кимда-ким шу шахсларнинг ҳаракатларидан жабр кўрган бўлса, қўрқмасдан мурожаат қилинглар” деган мақсадда уларнинг юзини очиқ эълон қилдик. Бу ерда айбсизлик презумпциясининг ҳеч қанақа алоқаси йўқ деб ўйлайман. Улар суд ҳукми чиқмагунча айбдор деб ҳисобланмайди, лекин дастлабки тергов ва тезкор хизматлар ўзининг ишини қилиши керак”, – деди у.
