«Qirg‘izistonni Rayim va Jyengo emas, prezident boshqaradi» - Tashiyev uyushgan jinoyatchilikka qarshi kurashni kuchaytirishni va’da qildi

Qamchibek Tashiyev Qirg‘izistonni xavfsiz va demokratik mamlakatga aylantirish bosh vazifa ekanini ta’kidlagan.

«Uyushgan jinoiy guruhlarga qarshi kurash chog‘ida xodimlarimiz o‘z majburiyatlarini bajarishmoqda. Biz budjetga 1 mlrd 200 mln dollar mablag‘ni qaytardik», — degan Tashiyev.

Qirg‘iziston MXDQ raisi jinoyatchilar in qurgan maskanlar ham aniqlanayotganini qayd etgan. Kechaning o‘zida Qamchi Qo‘lboyevning yana 10 million dollarlik boyligi aniqlangan.

«Masalan, «Ay-Peri» binosi go‘zallik saloni sifatida tanish, biroq u yerda banditlar o‘ziga klub yasab olishgan. Biz uni davlat hisobiga qaytardik. Toshko‘mirda ham banditlar hukmronlik qilishgan, uni ham qaytardik. Kechaning o‘zida Qamchi Qo‘lboyevning yana 10 mln dollar mablag‘ini aniqladik. Ular o‘z ixtiyori bilan mablag‘ni davlatga qaytarishdi. Bungacha 15 mln va 12 mln dollar qaytarishgan edi», — degan Tashiyev.

Tashiyevga ko‘ra, katta kompaniyalarda banditlarning ulushi bo‘lgan. Ular o‘z ulushlaridan voz kechib, pulni davlatga qaytarishmoqda.

«Biz bir tiyinini ham o‘zimizga olmaymiz. Hammasi davlatga topshiriladi. Ya’ni, biz — MXDQdagilar bir so‘mni ham tasarruf etmaymiz. Biz faqat statistikaga javob beramiz. Xodimlarga buyurilgan: qaytarilgan barcha mablag‘lar budjetga topshiriladi. Bir so‘mga ham teginilmaydi. Xodimlar shunday topshiriqni bajarishmoqda», — degan Qirg‘iziston MXDQ rahbari.

Tashiyev uyushgan jinoyatchilikka qarshi murosasiz kurash davom ettirilishini ta’kidladi. Uning so‘zlariga ko‘ra, Jyengo laqabli kriminal avtoritet Qodir Do‘so‘nov o‘g‘ri mafkurasidan tongan bo‘lsa ham, «o‘z jinoyatlarini davom ettirmoqda».

«Uyushgan jinoyatchilikka qarshi kurash yanada keskinlashadi. Men Jyengoni olib tashladim. U o‘g‘rilik faoliyatidan voz kechishini aytgan edi, lekin aslida yig‘ishtirgani yo‘q. U faqat ekranda voz kechdim, dedi. Hayotda eski ishlarini davom ettirmoqda. Lekin men uning uyushgan jinoiy guruh rahbari bo‘lishiga yo‘l qo‘ymayman. Men bu kunlar kelishiga ikki yil tayyorgarlik ko‘rdim», — degan Tashiyev.

Qirg‘iziston MXDQ rahbari uyushgan jinoiy guruh bilan aloqador har qanday insonni mansabidan olib tashlashni va’da qildi.

«Na Rayim Matraimov, na Jyengo, hech kim mamlakatni boshqarmaydi. Faqat prezident boshqaradi. Deputatlar, iltimos, bizni qo‘llanglar. Ha, biz ham kezi kelsa xatolarga yo‘l qo‘yamiz. Ishdan olinayotganlarning barchasi banditlar bilan aloqada bo‘lgan. Mana, mening oldimga deputatlardan biri kelib, oblastlardan birining rahbari ishdan olinmasligini so‘radi. Men shunday deyman: u Kazak laqabli uyushgan jinoiy guruh rahbari bilan aloqada bo‘lgan. Hokim qamoqxonaga u uchun jo‘natma jo‘natgan», — degan MXDQ raisi.

Qamchibek Tashiyev Qirg‘izistonni oilaviy klanlar va korrupsiyadan tozalash niyatida ekanini ham ta’kidlagan. U MXDQning uch xodimi pora tufayli ishdan bo‘shatilganini ham aytdi.

«Kuni kecha uch xodimni pora uchun ishdan bo‘shatdim. Ulardan biri 23 ming dollar pora olgan, ikkinchisi investorga 82 ming dollar berishda yordam bergan. O‘rinbosarlarimga hayfsan e’lon qildim, bu holat yana takrorlansa ishdan bo‘shatilishi haqida ogohlantirdim. Bizning harakatlarimiz faqat yurt ravnaqi uchun yo‘naltirilgan», — degan Tashiyev.

Eslatib o‘tamiz, 2023 yilning 4 oktyabr kuni Bishkekda o‘tazilgan maxsus operatsiya mobaynida kriminal avtoritet Qamchi Qo‘lboyev otib o‘ldirilgan edi. Qo‘lboyevning o‘limidan so‘ng bir necha kriminal avtoritetlar va uyushgan jinoiy guruh a’zolari jinoyat faoliyat va kriminal statusdan voz kechganini e’lon qilishdi. Shuningdek, MXDQ jinoiy guruhlarni moliyalashtirgan 30 kishini hibsga olgan. Ularning orasida mashhur biznesmenlar ham bor.