Қозоғистоннинг «КазТрансОйл» миллий оператори 1 январдан бошлаб, Россия нефтининг ТОН-2 участкаси орқали транзити учун тарифлар оширилганини эълон қилди. Бу ҳақдаги қарор компаниянинг расмий сайтига жойланган.
Янгиланган маълумотларга кўра, нефтнинг 1 минг км масофага транзит нархи 11,28 долларга (ҚҚСсиз) тенг. Ушбу қарор компания бошқаруви раиси томонидан декабр ойи бошида тасдиқланган. Аниқлик киритилишича, бунгача 1 минг км масофага транзит нархи 9,3 долларни ташкил қилган. Бундай параметрлар 2018 йилда келишилган эди.
ТОН-2 йилига 10 миллион тонна нефтни ўтказиш қувватига эга. Шу билан бирга, лойиҳа қуввати йилига 18 миллион тоннага етади. Белгиланганидек, Қозоғистон ҳудуди бўйлаб 186,25 километрлик участка мавжуд – у орқали Россиядан нефт Павлодар нефт-кимё заводига етказиб берилади, сўнгра бир қисми Хитой ва Ўзбекистонга жўнатилади.
