АҚШ G7 саммитида Россияга қарши янги санкцияларни эълон қилади

Қўшма Штатлар шу ҳафта Италияда бўлиб ўтадиган G7 саммитида Россияга қарши янги санкциялар ва экспорт назорати тўғрисида эълон қилмоқчи. Бу ҳақда 11 июн, сешанба куни Оқ уй матбуот котиби Жон Кирби маълум қилди. 

Унинг сўзларига кўра, Вашингтон Россияга Украинада уруш олиб боришда ёрдам бераётган ташкилот ва тармоқларга қарши қаратилган бир қатор янги самарали санкциялар ва экспорт назоратини жорий қилади. «Биз Россия ҳарбий машинаси учун харажатларни оширишда давом этамиз», деди Оқ уй Миллий хавфсизлик кенгашининг стратегик алоқалар бўйича координатори.

Шу билан бирга, Кирбининг сўзларига кўра, Қўшма Штатлар G7 саммитида Россиянинг музлатилган активларидан фойдаланишда Украинага ёрдам бериш чораларини эълон қилади. G7 етакчилари Киевга ёрдам бериш учун Россия Марказий банкининг музлатилган 300 миллиард евролик активларидан олинган фоизли фойдадан фойдаланиш борасида келишиб олишга умид қилмоқда. Ғоя олинган фойдани 50 миллиард долларгача бўлган кредитлар учун гаров сифатида ишлатишдан иборат.

Байден ва Зеленский G7 саммитида учрашади 

Жон Кирбининг хабар беришича, G7 саммити доирасида АҚШ президенти Жо Байден ва Украина етакчиси Володимир Зеленский икки томонлама учрашув ўтказади, сўнгра 13 июн, пайшанба куни қўшма матбуот анжумани бўлиб ўтди.

Вашингтонга кўра, G7 аъзолари Пекиннинг Россия ҳарбий саноатини қўллаб-қувватлашини ҳам муҳокама қилади. «Биз Хитойнинг зарарли глобал оқибатларга олиб келаётган бозордан ташқари сиёсатига қарши чиқамиз», - дея қўшимча қилди Кирби. 

Япония Россиянинг Украинага қарши урушини қўллаб-қувватлаганлик учун санкциялар тайёрламоқда

Япониянинг NHK медиа-компанияси хабар беришича, Япония бош вазири Фумио Кишида ҳам Италияда бўлиб ўтадиган G7 саммитида янги экспорт санкцияларини жорий этиш режасини тақдим этишга тайёрланмоқда. Улар Россия ҳарбий саноатида фойдаланиш мумкин бўлган товарларни етказиб бериш орқали Украинага Россия ҳужумини қўллаб-қувватловчи компанияларга, хусусан, Хитой компанияларига қарши қаратилган бўлади. 

13-15 июн кунлари Италия жанубидаги Бриндизи шаҳрида дунёнинг энг ривожланган еттита саноати ривожланган давлати (Британия, Германия, Италия, Канада, АҚШ, Франция ва Япония) иштирокидаги 50-саммит бўлиб ўтади.