“Бу сув ноқонуний сотиб олинган” – Шерзод Қудбиев тадбиркорлар билан мулоқотда сувнинг маркировка кодини текширди  

17 июл куни Тошкент шаҳрида жойлашган “International Hotel Tashkent” меҳмонхонасида президентнинг тадбиркорлар билан очиқ мулоқотига тайёргарлик кўриш доирасида озиқ-овқат маҳсулотлари ишлаб чиқариш соҳасида фаолият юритувчи тадбиркорлар билан очиқ мулоқот бўлиб ўтди.

Унда иштирок этган Алкоголсиз ичимликлар ва шарбатлар ишлаб чиқарувчилар уюшмаси раҳбари Алфия Мусин Солиқ қўмитаси раиси Шерзод Қудбиевдан сув ва алкоголсиз маҳсулотларга рақамли маркиковкалашни жорий этишни кечиктиришни сўради. ДСҚ раиси таклифни рад этди.

У 1 мартдан сув ва алкоголсиз маҳсулотлар учун мажбурий рақамли маркировкалаш жорий этилганини тўғри қарор деб баҳолади. 

Алфия Мусиннинг сўзларига кўра, бунга ҳатто йирик компаниялар томонидан ҳам самарали техник ечим йўқ.

Аммо Солиқ қўмитаси раҳбари ишлаб чиқаришни секинлаштирмайдиган маркировкалаш ускуналари мавжудлигини таъкидлади.

Шерзод Қудбиев, шунингдек, контрафактлар кўпайиб бораётгани сабабли ўзи ёпиштирувчи ёрлиқларга қарши чиқди ва стол устида турган сувнинг маркировка кодини текширди.

“Бу сув ноқонуний равишда сотиб олинган. Энди мен солиқ назоратига меҳмонхона бу сувни қандай сотиб олганини текширишни топшираман. Ушбу ДатаМатрих (маркировка) ҳали ҳам ишлаб чиқарувчида. Агар бу тўғри бўлса, қонуний жиҳатдан, бу сув ё истеъмолчида, ё дилерда бўларди”, деди у.

Лекин Қудбиев ўтиш даврида сувга ёрлиқ қўйилган бўлиши мумкинлигини қўшимча қилди.

“Маркировкалаш бозорни оққа олиб киради, бироқ жараён узоқ давом этгани учун унинг таъсири нозик бўлиб қолмоқда”, - дея қўшимча қилди Солиқ қўмитаси раиси.

Spot.uz нашрининг эслатишича, феврал ойи охирида алкоголсиз ичимликлар ва шарбатлар ишлаб чиқарувчилар уюшмаси президентга рақамли маркировкалашни мажбурий жорий этишни бекор қилишни, бизнес ва ҳукумат ўртасида мунтазам мулоқотни йўлга қўйишни сўраб хат йўллаган.

Рақамли маркировкалаш талаби кучга киришидан бир неча кун олдин йирик алкоголсиз ичимликлар ишлаб чиқарувчилари бунга тайёр эмаслигини хабар қилган. Бундан ташқари, корхоналар маркировкалашнинг ижобий таъсирини кўрмаётгани, шунингдек, ишлаб чиқариш ва сотишнинг кескин қисқаришини кутаётганини маълум қилган. Бироқ Солиқ қўмитаси сув ва ичимликларни рақамли маркировкалаш яширин иқтисодиёт ҳажмини камайтиради деб ҳисоблайди.

Аввалроқ, маркировкалаш учун зарур бўладиган ускуналар божхона божидан озод этилиши маълум қилинганди.