Навоийда алимент тўлашдан қочиб юрган ота чойхонадан топилди

Икки фарзандини моддий таъминлашдан бўйин товлаб, яшириниб юрган эркак 3 ой олдин қидирувга берилган бўлган. У Навоий шаҳридаги чойхонада спиртли ичимлик ичиб ўтирганида ушланган.

Фото: Сунъий интеллект чизган сурат

Навоийда фарзандлари учун алимент тўламасдан қочиб юрган ота чойхонадан топилди. Бу ҳақда Kun.uz’га Навоий вилояти МИБ ахборот хизмати хабар берди.

Маълум қилинишича, МИБнинг Навбаҳор туман бўлими иш юритувида қарздор У.Ў.дан ундирувчи М.Т.нинг фойдасига икки нафар фарзандининг моддий таъминоти учун алимент ундириш ҳақидаги ижро ҳужжати бўлган. Аммо У.Ў. жами 18 млн сўмдан ортиқ алимент пулини ўз вақтида тўламасдан, яшириниб юрган. Оқибатда 3 ой олдин унга нисбатан қидирув эълон қилинган.

Олиб борилган тезкор тадбирлар давомида қарздор У.Ў. Навоий шаҳридаги чойхонада спиртли ичимлик истеъмол қилиб ўтирганида ушланган. Унга нисбатан қонуний чора кўриш учун тўпланган ҳужжатлар жиноят ишлари бўйича туман судга юборилган.

Суд қарори билан қарздорга нисбатан 15 сутка маъмурий қамоқ жазоси қўлланган.

Қайд этилишича, ҳозирда Навоий вилоятида алимент тўламасдан қочиб юрган 63 нафар қарздорни топиш чоралари кўрилмоқда. Уларнинг 24 нафари республиканинг турли ҳудудларида яшириниб юргани, 39 нафари эса чет давлатга чиқиб кетгани аниқланган.

Олдинроқ Фарғонада алимент тўлашдан қочиб юрган фуқаро уй қудуғидан топилганди.

#Навоий #алимент