Илан Шорнинг компаниялар тармоғи РФга қарши санкцияларни четлаб ўтиш учун ишлаяпти - Rise Молдова

Молдовалик олигарх Илан Шор Россияга қочиб кетганидан сўнг, Россия Федерациясининг Украинага қарши тажовузкор уруши муносабати билан Россия Федерациясига қарши жорий этилган санкцияларни четлаб ўтиш билан шуғулланувчи тўртта компаниядан иборат тармоқни яратди, дейилади 11 октябр, жума куни чоп этилган «Rise Молдова» нашри суриштирувида. Ушбу фирмалар, санкциялар чекловларига қарамай, Россия бизнесига халқаро бозорларда бўлиш имконини беради, тўловларни амалга ошириш, кредитлар олиш ва тўлов тизимини бошқариш хизматларини тақдим этади, дейилади суриштирувда. 

Шор ширкатларининг энг муҳими А7 бўлиб, унинг асосий улушига эгалик қилади ва 49 фоизи Ғарб санкциялари остида қолган Россиянинг «Промсвязбанк»ига тегишли. «Ушбу Россия банки Молдова олигархи томонидан сайловчиларга келаси ҳафта референдумга «йўқ» дейиш ва номи Telegram иловаси орқали Москвадан юбориладиган номзодга овоз бериш учун фойдаланилмоқда», деб ёзади «Rise Молдова» суриштирувчилари. Аввалроқ маълум бўлишича, биргина сентябр ойининг ўзида «Промсвязбанк» орқали 130 минг молдоваликнинг ҳисоб рақамларига 15 миллион доллар (тахминан 13,5 миллион евро) ўтказилган, улар мамлакатнинг Европа йўлига қарши овоз бериши режалаштирилган.

Молдова РФни Евроиттифоқ бўйича референдум иштирокчиларига пора берганликда айблади

Россия россияпараст олигарх Илан Шорнинг «мафия» тармоғи орқали Молдованинг 130 минг фуқароси ҳисобига бўлажак референдумда улар мамлакатнинг Европа Иттифоқига киришига қарши овоз беришлари учун 15 миллион доллардан ортиқ маблағ ўтказди. Бу ҳақда 3 октябр куни Politico нашри Молдова полицияси бош инспекцияси раҳбари Виорел Cэрнаутианага таяниб хабар берди. Унинг сўзларига кўра, «Молдова гибрид уруш ва дезинформация билан биргаликда сайловчиларнинг мисли кўрилмаган сотиб олинишига дуч келмоқда». Аниқлик киритилишича, биргина сентябр ойида мамлакат фуқароларига 15 миллион доллар ўтказилган.

Тергов маълумотларига кўра, ҳозирда тақиқланган худди шу номдаги россияпараст партия асосчиси Илан Шор (апрел ойида у Москвада Молдова партияларининг россияпараст «Ғалаба» блокини тузган ва унинг раиси бўлган) сайловчиларга пора бериш учун мўлжалланган маблағларни банклар тармоғи орқали ювишга ёрдам берган.

Молдовада Шор банк фирибгарлиги учун сиртдан 15 йиллик қамоқ жазосига ҳукм қилинди.

«Молдова: актуально» нашри Илан Шор иштирок этган схема тафсилотларини эълон қилди. Ўтказмалар Россия Федерацияси Мудофаа вазирлиги томонидан назорат қилинадиган «Евразия» автоном нотижорат ташкилоти ва Промсвязбанк орқали амалга оширилди. Пулни олган ҳудудий координаторлар уни «беқарорлаштирувчи ҳаракатлар» уюштириш учун ўз тарафдорларига топширган.