Туркия Радио ва телевидение олий кенгаши (RTÜK) сунъий интеллектга асосланган Via+ медиа-мониторинг тизимини ишлаб чиқишни якунламоқда. Мазкур тизим 800 дан ортиқ телеканал ва интернет-платформани туну кун кузатиб бориш, эҳтимолий қонунбузарликларни автоматик тарзда аниқлаш ҳамда регулятор ходимлари учун ҳисоботлар тайёрлаш имконини беради. Бу ҳақда RTÜK раиси Меҳмет Дониш 8 ноябрь куни Anadolu агентлигига берган интервьюсида маълум қилди.
Унинг сўзларига кўра, тизим бир вақтнинг ўзида олтита сунъий йўлдошдан эфир сигналларини қабул қилиш, 12 та тилга таржима қилиш имконияти билан кунига 19,2 минг соатлик аудиоёзувни таҳлил қилиш ҳамда 300 миллиондан зиёд видеокадрни қайта ишлаш қувватига эга бўлади. Сунъий интеллект юзага келиши мумкин бўлган қоидабузарликларни мустақил равишда аниқлайди ва тайёр ҳисоботларни RTÜK мутахассисларига узатади. Ишланма тахминан 90 фоизга якунланган бўлиб, айни пайтда синов жараёнлари ва ходимларни ўқитиш давом этмоқда. Дониш янги тизимни Туркиянинг кўп босқичли «Пўлат гумбаз» ҳаво ҳужумидан мудофаа тизими лойиҳасига қиёслади: «Мудофаа соҳасида пўлат гумбазимиз бўлганидек, Via+ ҳам медиа соҳасидаги пўлат гумбазимизга айланади».
RTÜK томонидан аввалроқ эълон қилинган тавсифга кўра, тизим нутқни вақт кўрсаткичлари билан бирга матнга айлантира олади, хорижий кўрсатувларни турк тилига таржима қилади, тасвирларни таҳлил этади, муайян объектларни танийди ҳамда белгиланган триггер-сўзларни аниқлайди. Шу билан бирга, регулятор сунъий интеллект ўзича жазо тайинламаслигини, якуний қарор идора ходимларида қолишини таъкидламоқда. Рақамли платформалар учун алоҳида механизм кўзда тутилган: улар RTÜK ташкилотига контент каталогларини тақдим этади, мутахассислар эса текшириш учун материалларни мустақил танлаб олади. Дониш, шунингдек, регуляторнинг интернет-платформаларга нисбатан ваколатларини кенгайтирувчи қонун лойиҳаси тайёрланаётганини ҳам билдирди.
