Брэндга 1999 йилдан 2009 йилгача бўлган даврда олти нафар аёлга нисбатан жинсий зўравонликнинг етти ҳолати, жумладан, учта зўрлаш бўйича айблов қўйилган эди.
5 ноябрь куни ҳакамлар ҳайъати актёрни фақат тўртта эпизод — 2004 йилдан 2009 йилгача содир этилган битта зўрлаш ва учта шилқимлик ҳолати бўйича айбдор деб топди. Тўрт нафар аёл жабрланувчи деб тан олинди. Уларнинг барчаси ўз шахсини умрбод сир сақлаш (анонимлик) ҳуқуқига эга.
Брэнднинг хатти-ҳаракатларидан жабрланганлардан бири судда «руҳий жароҳат билан яшаётгани» ва ҳодисадан кейин ўзига ОИВ юққан бўлишидан хавфсираганини билдирди. Яна бири эса қизиқчи «қилмишидан пушаймон эмас» деб ҳисоблайди.
Актёрнинг ўзи айбини тан олмади.
Брэндга нисбатан тергов The Times ва Channel 4 томонидан ўтказилган журналистик суриштирувдан сўнг бошланган эди.
Рассел Брэнд — Буюк Британиянинг энг машҳур стендапчиларидан бири. У фильм ва сериаллардаги роллари, жумладан, «Парвозда» романтик комедиясидаги роли ҳамда «Ёвуз мен» ва «Ёвуз мен 2» мультфильмларида доктор Нефариога овоз бергани билан танилган. 2010–2012 йилларда Брэнд хонанда Кэти Перри билан турмушда бўлган. BBC Брэнднинг Британия поп-маданиятига сезиларли таъсир кўрсатганини қайд этган.
