АҚШда жуфтлик тўйи учун тўплаган пулларни уйсиз итнинг операциясига сарфлади

АҚШнинг Арканзас штатида яшовчи жуфтлик бошпанасиз итга ёрдам берди, деб ёзмоқда People.

Дилан Маккей ва унинг қайлиғи Эмили Робертс голдендудл зотли итнинг операцияси учун тўйга жамғараётган пулларидан сарфлади. Итни ўткинчилар йўл четидан топиб олиб, бу ҳақда ижтимоий тармоқларда ёзган. Жонивор оғир яраланган эди. Дилан ва Эмили ит ҳақидаги постни кўргач, 20 дақиқада воқеа жойига етиб келган. Жониворни машина уриб юборгани маълум бўлди.

“Кун бўйи ёмғир ёққани учун у ивиб кетганди. Орқа оёқлари қонга беланган, синганга ўхшарди... У қалтирар ва йўталарди”, — деб эслайди жуфтлик.

Итга Эклин деб ном қўйишди.

Маккей итни ветеринария клиникасига олиб борди. Шифокорлар унинг сон суяги сингани, бу иккала орқа оёққа таъсир қилганини аниқлади. Бундан ташқари, Эклин шу ҳолатда ёмғир остида узоқ қолгани сабабли аҳволи янада оғирлашган.

Итда микрочип бўлмагани учун унинг эгалари ҳақида ҳеч қандай маълумот топилмади, натижада жонивор учун молиявий жавобгарлик Дилан ва Эмилининг зиммасига тушди.

“Ўша пайтда бу кучукчага ёрдам бериш учун зарур бўлган ҳамма нарсани қилишга қарор қилдик. У яшашга лойиқ”, — деб ёзди жуфтлик ижтимоий тармоқларда.

Эклиннинг оёқларида реконструктив жарроҳлик амалиётини ўтказиш керак эди. Маккей ва Робертснинг айтишича, шифокорлар бунга 10 -15 минг доллар кетишини айтган. Улар йиғиб қўйган барча маблағларини ишлатиб, тўловни амалга оширишга рози бўлган.

“Тиббий харажатларни тўлаш учун тўй фондимиз ва умумий жамғармаларимиздан пул олдик”, — дейди жуфтлик. “Уни қутқариш ва унга яхшироқ ҳаёт бахш этиш имкониятига эга бўлганимиздан бахтиёрмиз”.

Дилан ва Эмили итга бундан кейин ҳам ғамхўрлик қилмоқчи. Улар операция муваффақиятли ўтганини айтди. Эклиннинг реабилитацияси билан боғлиқ харажатлар учун жуфтлик GoFundMe тармоғида саҳифа очди.

“Сизларнинг шарофатингиз билан қизалоғимиз зарур ёрдамни олмоқда”, — деб таъкидлади улар.