Япониянинг Нагоя шаҳрида Аити префектураси сиёсий ва ишбилармон доираларининг 100 дан ортиқ вакили иштирокида Тошкент вилояти билан иқтисодий ҳамкорликни ривожлантиришга бағишланган давра суҳбати бўлиб ўтди. Бу ҳақда «Дунё» ахборот агентлиги хабар берди.
Тадбир Ўзбекистоннинг Япониядаги элчихонаси томонидан SYS Holdings компанияси билан ҳамкорликда ташкил этилди.
Унда Япония парламенти депутати Такако Судзуки, Аити префектураси вице-губернатори Юкио Эгути, префектуранинг собиқ губернатори Масааки Канда, маҳаллий ҳокимият, молия институтлари ва йирик компаниялар раҳбарлари қатнашди.
Хусусан, Sumitomo Mitsui Banking Corporation, SMBC Nikko Securities, Hyakugo Bank, TOPPAN, Itochu Techno-Solutions, Fuji Dream Airlines ва Kaikoukai каби компаниялар вакиллари иштирок этди.
Учрашувда Тошкент вилояти ҳокими ўринбосари Жаҳонгир Мамажонов ҳудуднинг иқтисодий ва инвестициявий салоҳиятини тақдим этди. У япониялик тадбиркорларни саноат кооперацияси ва қўшма инвестиция лойиҳаларини амалга оширишга таклиф қилди.
Япония парламенти депутати Такако Судзуки Ўзбекистонда олиб борилаётган ислоҳотлар ва иқтисодий ривожланишни юқори баҳолади. Унинг таъкидлашича, бу жараёнлар япон бизнеси учун янги имкониятлар яратмоқда.
Судзуки Аити префектураси тадбиркорларини Тошкент вилояти билан ҳамкорликни фаоллаштиришга чақирди.
Учрашув давомида ўзбекистонлик IT мутахассисларни Японияда ишга жойлаштириш масаласи ҳам муҳокама қилинди
Жумладан, AIGA компанияси раҳбарияти билан IT кадрларини тайёрлаш ва ишга жойлаштириш бўйича музокаралар ўтказилди.
Компания ўзбекистонлик IT соҳасида ишлаш истагидаги номзодлар ва ёш мутахассисларни Японияга ишга қабул қилишга тайёрлигини маълум қилди. Шунингдек, 2027 йилда Ўзбекистонга ташриф буюриш режаси билдирилди.
Тадбирда Ўзбекистон ва Япония халқлари ўртасидаги тарихий алоқалар ҳам тилга олинди. Хусусан, япон ҳарбий асирларининг Алишер Навоий номидаги Тошкент давлат академик катта театри қурилишидаги иштироки ва ўзбек халқининг япон қабристонларига кўрсатаётган ҳурмати алоҳида эътироф этилди.
Маълумот учун, Аити префектураси Япониянинг етакчи саноат марказларидан бири ҳисобланади. Бу ҳудудда автомобилсозлик, машинасозлик, авиация ва кимё саноати ривожланган. Нагоя шаҳри префектуранинг маъмурий марказидир.
