Фронтдаги вазият: РФ қуролли кучлари кутилмаганда Украинанинг яна бир «қалъаси» штурмини бошлади

Россия қўшини бир вақтнинг ўзида Украина қуролли кучларининг Донбассдаги ва Харкив области шимоли-шарқидаги бир неча «қалъа»ларини штурм қилмоқда. Ноябр ойи ўрталарида улар кутилмаганда Купянскнинг шарқий қисми ҳамда Часив Яр шаҳри марказига бостириб киришганди, ой охирига келиб — Курахово маркази ва Велика Новосилканинг шарқий чеккаларига ҳужум қилинди. Иккинчи ҳолатда Россия қуролли кучларининг штурмчи гуруҳлари шарқдаги Вуҳледар ва Шахтёрск томондан 10 километр масофадаги бўш далаларни босиб ўтган — ҳолбуки бунга қадар Велика Новосилкага жанубдан шунча масофани босиб ўтиб яқинлашиш учун бир йил вақт кетганди. Афтидан, Донбасснинг жанубий қисмидаги украин қисмлари Курахово мудофааси учун жамланган, Велика Новосилка эса шарқдан бўладиган ҳужумлардан яхши ҳимояланмаган. Умуман олганда, Украина қуролли кучларига ҳамон Россиянинг бир вақтнинг ўзида бир неча йўналишдан қилинаётган ҳужумларини тўхтатиш учун куч етишмаяпти: агар бир участкада РФ бўлинмалари ҳаракати секинлаштирилса, дарҳол қўшни участкада мудофаа ёриб ўтилмоқда.

Велика Новосилка

РФ қуролли кучлари Велика Новосилкадан жануби-ғарбдаги ҳудудларга ноябр ойи ўрталарида ҳужум бошлаганди. Украина қуролли кучлари 2023 йил ёзидаги қарши ҳужум давомида озод этган аҳоли яшаш манзиллари ҳудудлари ва харобалари эгаллаб олинган: Левадне, Ривнопол, Новодаровка. Шу билан бирга, Велика Новосилкадан жанубда, Мокрие Яли дарёси бўйида, жанглар тиниб қолган — бунга қадар 2023 йил ёзидан буён бу ҳудуд фаол ва тўхтовсиз ҳарбий ҳаракатлар майдонига айланганди.

Ноябр ойи охирида маълум бўлдики, Велика Новосилка ғарбига қилинган ҳужумлар Украина қуролли кучларини ушбу район марказига шарқдан қилинадиган асосий ҳужумдан чалғитиш вазифасини ўтаган. Октябр ойида Вуҳледарни босиб олган ва шу ердан Курахово йўналишида юриш бошлаган РФ қуролли кучлари кейинги шаҳар эгалланишини кутмасдан Велика Новосилкага шарқдан ҳужум қилиш учун алоҳида қўшин тўплади. Икки гуруҳдан бири Вуҳледар — Велика Новосилка йўли бўйлаб, бошқаси аввалроқ эгалланган Шахтёрск томондан юриш бошлади — бу бўлинмалар 10 километр масофадаги очиқ ҳудудларни босиб ўтишди ва Велика Новосилка чеккаларига етиб келишди.

Катта эҳтимол билан, яқин ҳафталар ичида Россия қўшини муҳим қалъа бўлган ушбу район марказига уч томондан — ғарб, шарқ ва жанубдан ҳужум қилади — Селидове қамалида ҳам шундай йўл тутилганди, ҳозирда Кураховога юриш ҳам шундай кечмоқда.

Курахово

Россиянинг шимолдан Кураховога юриш қилаётган қўшини барибир Курахово сув омборининг ғарбий чеккасига ўтиб, Украина қуролли кучларининг таъминот йўлини кесиб қўйишнинг уддасидан чиқа олмади.

Ушбу гуруҳ қисмлари қайиқларда сув омборидан сузиб ўтиб,  Курахово марказига етиб келган. Бу вақтда шаҳар марказига шарқдан юриш қилган бўлинмалар ҳам кирган. Сўнгги кунларда Курахово марказидаги Ғалаба кўчасида жанглар бўлиб ўтмоқда.

Худди шу вақтда РФ қуролли кучлари Кураховонинг шарқий чеккаларидан жанубдаги Далнее қишлоғига ёриб кирган. Россиянинг жанубдан ҳаракатланган бошқа бир гуруҳи Далнеедан жануброқдаги Успеновка қишлоғи чеккаларига яқинлашган. Бу эса Украинанинг Сухие Яли дарёси водийсидаги йирик гуруҳини қуршов хавфи остида қолдирган. Бу қўшин аста-секинлик билан Успеновка орқали ғарбга чекинмоқда. Успеновка РФ қуролли кучлари томонидан эгалланган тақдирда, Россия армияси Кураховога жанубдан ҳам кириши мумкин бўлади.

Часив Яр

РФ қуролли кучлари анча олдинроқ Часив Яр марказини Бахмутдан ажратиб турувчи Северский Донец — Донбасс каналини бир неча жойдан кечиб ўтганди. Украина қуролли кучлари шарқий соҳилдаги барча плацдармларини тарк этишга мажбур бўлган. Аммо сўнгги вақтларгача Россия қўшини ушбу плацдармлардан украин мудофааси ичкарисига ёриб кира олмаганди — бунга украинларнинг Часив Ярдаги позициялари тепароқда жойлашгани сабаб эди.

Ноябр ойида Россия қўшини канал бўйидаги плацдармлардан биридан Часив Яр ичкарисига киришга муваффақ бўлди. Энди жанглар йирик комбинат жойлашган асосий тепалик атрофида кечмоқда.

Худди шу вақтда РФ қуролли кучлари Часив Ярни жануб ва шимолдан айланиб ўтишга ҳам ҳаракат қилмоқда. Бу гуруҳлар муваффақиятга эришган тақдирда Константиновка хавф остида қолади. Бу эса Украина қуролли кучларининг Торецкдаги мудофааси қулашига олиб келади, келгусида Краматорск ва Словянскка юриш учун шароит яратади.

Курск области

Украина қуролли кучлари Курскдаги плацдарми шимоли-ғарбидаги сўнгги таянчи — Олговка ўрмонини тарк этди. Ёзда Кореново райони маркази ҳамда Рилск — Курск йўли шимоли-шарқига ёриб киришга уринган украин бўлинмаси кейинроқ Суджа — Коренево йўлидан шимолдаги ушбу ўрмонга чекинганди.

Бир неча ҳафта давом этган жангларда Россия қўшини ўрмонни қарийб қуршаб олди, бу эса Украина қуролли кучлари қўмондонлигини бўлинма қолдиқларини Малая Локняга эвакуация қилишга мажбур қилди.

Малая Локнянинг ўзига эса Россия қўшини яқинлаша олмаяпти: ғарбдан қилинган ҳужумлар ҳам (Новоивановка томондан), шимолдан (Погребка орқали) қилинган ҳужумлар ҳам ҳозирча муваффақият келтирмади. Россия қисмлари бу ҳужумларда кўплаб техникаларидан айрилган.