Бунга йўл ёқасидан оқиб ўтувчи Фарғона каналида сув сатҳи кўпайиши сабаб бўлган. Ҳодиса оқибатида йўлдан ўтаётган Damas ағдарилиб кетган. Йўл ярим йил муқаддам таъмирланганди.
Фарғона вилояти Бағдод туманида автомобил йўлининг бир қисми ўпирилиб тушди. Вилоят ФВБ ҳолат юзасидан маълумот берди.
Маълум қилинишича, 24 февралга ўтар кечаси Фарғона ҳалқа автомобил йўлининг 286-километрида йўл қопламаси чўкиб қолган.
Бунга йўлнинг ўнг томонидан оқиб ўтувчи Фарғона каналида сув сатҳи кўпайиб, автомобил йўлининг таг қисмидан сизиб ўтиши сабаб бўлган.
Ижтимоий тармоқларда тарқалган кадрда йўлда ҳаракатланиб кетаётган Damas русумли автомобил ағдарилиб кетганини кўриш мумкин. Автомобил ичида бўлганларнинг ҳолати ҳақида маълумот йўқ.
Ҳозирги вақтда мазкур автомобил йўлининг Қўқон-Фарғона йўналиши бўйича 285 километр ва Фарғона-Қўқон йўналишининг 288 километрларидан вақтинчалик ҳаракат чекланган.
Туманнинг 40 В 047 Бағдод-Дашт-Утарма (Қўқон-Фарғона) ва 40 В 046 Янгиқўрғон-Утарма-Қақир (Фарғона-Қўқон) автомобил йўллари орқали ҳаракат ташкил этилган ва йўл чўккан қисмида таъмирлаш ишлари олиб борилмоқда.
Мазкур автомобил йўли 2024 йил август ойида жорий таъмирланган. Транспорт воситаси ҳаракат жадаллиги суткасига 30–35 мингни ташкил этади, ҳаракат вақтинча тўхтатилиб, ташкил этилган автомобил йўлларининг 25 километрга узайган.
Фарғона вилояти Автомобил йўллари бош бошқармаси берган маълумотига кўра, 24 феврал куни соат 18:00 га қадар автомобил йўлида таъмирлаш ишлари якунланиб транспорт воситаларининг ҳаракати йўлга қўйилиши режалаштирилган.
