Фон дер Ляйен: Украина 2030 йилгача Европа Иттифоқига кира олади

Украина ислоҳотларни ҳозирги суръатда ва худди шундай пухталик билан давом эттирса, 2030 йилгача Европа Иттифоқига қўшилиши мумкин. Бу ҳақда Еврокомиссия президенти Урсула фон дер Ляйен 24 феврал, душанба куни Россиянинг кенг кўламли ҳужуми уч йиллиги муносабати билан Киевга келганида Украина президенти Володимир Зеленский ва бошқа хорижий етакчилар билан бўлиб ўтган қўшма матбуот анжуманида айтиб ўтди. Унинг сўзларига кўра, у Украина томонидан шундай оғир уруш шароитида олиб борилаётган ислоҳотларнинг тезлиги, сифати ва самарадорлигидан ҳайратда.

Фон дер Ляйен Украинадаги уруш Европа келажаги учун энг муҳим ва жиддий инқироз бўлиб қолаётганини қайд этди. У Украинага қарши уруш бошлаган Россияга қарши санкцияларни ҳозирча олиб ташлашнинг иложи йўқлигига ишонч билдирди, чунки улар Россия иқтисодиётига «катта таъсир кўрсатади». Бундан ташқари, Россия Федерацияси томонидан тинчликка интилишини кўрсатадиган аниқ қадамлар йўқ.

Кошта: Қачон музокаралар олиб боришни фақат Украина ҳал қилиши мумкин

Ўз навбатида, Европа Кенгаши раиси Антонио Кошта Украинанинг Европа Иттифоқига қўшилиш эҳтимолини унинг келажаги хавфсизлигининг энг муҳим кафолати деб атади. У, шунингдек, АҚШ президенти Доналд Трампнинг Россиянинг Украинага қарши урушини тўхтатиш бўйича музокараларни бошлаш саъй-ҳаракатларини олқишлади, шу билан бирга, «самарали ва узоқ муддатли тинчлик музокараларини бошлаш учун шарт-шароит қачон пайдо бўлишини ҳал қилиш» фақат Украина ҳуқуқи эканлигини таъкидлади. Унинг эслатишича, бу уруш «нафақат Украина, балки Европа хавфсизлигига ҳам тегишли».

Испания бош вазири Педро Санчес Украина ва Европани тинчлик музокараларига жалб қилиш, шунингдек, Киевга хавфсизлик кафолатларини тақдим этиш зарурлигини алоҳида таъкидлади. «Биз тинчлик ҳақида гапиришимиз керак бўлган бундай имконият учун жуда миннатдормиз. Аммо икки томонлама музокаралар олиб боришимиз учун бирдамлик жуда муҳим», — деди у.

Канада бош вазири Жастин Трюдо мамлакати Украина урушда ғалаба қозонмагунча уни қўллаб-қувватлашига ваъда берди. «Умид қиламанки, бу уруш яна бир йил давом этмайди», — дея қўшимча қилди у.