Залужний Украина президенти Воладимир Зеленский ва Доналд Трамп ўртасидаги кескинлик фонида пайшанба куни Лондонда бўлиб ўтган хавфсизлик конференциясида шундай баёнот берди.
Сўнгги кунларда Киев Вашингтон билан муносабатларни яхшилашга ҳаракат қилмоқда. Доналд Трамп 4 март куни кечқурун Конгрессга қилган мурожаатида Зеленскийни АҚШ шартларини бажаришга тайёрлиги учун мақтаганди.
Аммо кейинги куни, 5 мартда Зеленскийни музокаралар столига ўтиришга мажбурлаш учун АҚШ Украинага ҳарбий ёрдамни ва разведка маълумотларини алмашишни тўхтатди.
Бундай қадам Украинага жиддий зарар етказади ва жанг майдонидаги ҳарбийлар ва фронт ортидаги тинч аҳоли учун оғир оқибатларга олиб келиши мумкин.
Залужнийнинг пайшанба кунги сўзлари Украинанинг АҚШ ҳаракатларидан норозилиги ҳеч қаерга йўқолмаганидан далолат беради.
«Биз нафақат ёвузлик ўқи ва Россия дунё тартибини қайта кўриб чиқишга ҳаракат қилаётгани, балки АҚШ бу тартибни бутунлай йўқ қилаётганига гувоҳ бўлмоқдамиз», — деди Залужний.
Украина элчисининг қўшимча қилишича, АҚШ ва «ҳарбий жиноятчи» президент Владимир Путин бошчилигидаги Россия ўртасидаги музокаралар Оқ уй «пешвоз чиқиш учун Кремл томон қадам ташлаётгани»ни кўрсатади.
Уч йил давомида Украина қуролли кучлари бош қўмондони бўлганидан сўнг 2024 йилда Лондонга элчи этиб тайинланган Залужний Вашингтоннинг позицияси ўзгариши натижасида НАТО ўз мавжудлигини йўқотиши мумкинлигини ҳам тахмин қилди.
У Москванинг кейинги нишони «Европа бўлиши мумкинлиги» ҳақида огоҳлантирди.
Залужний Украинадаги уруш имкон қадар тезроқ тўхташини исташини айтди, бироқ шу билан бирга Трамп маъмурияти олиб бораётган музокаралар ҳамда Украина учун хавфсизлик кафолатларини бермасдан Москвага ён бераётганидан хавотир билдирди.
Трамп АҚШдаги сайловолди кампанияси вақтида урушга тезда нуқта қўйишга ваъда берганди. Феврал ойида АҚШ делегацияси Саудия Арабистонида дастлабки музокаралар учун Россия делегацияси билан учрашди. Ўша учрашувда на Европа, на Украина вакиллари бор эди.
АҚШнинг Украинага ёрдам беришни тўхтатиш қарорини Трамп маъмурияти расмийлари Киевни АҚШ раҳбарлигида тинчлик музокараларида ҳамкорлик қилишга мажбурлаш воситаси сифатида кўрмоқда.
Шундан сўнг, Зеленский Трамп билан ярашишга ҳаракат қилди ва энди унинг баёнотларида Россиянинг кейинги тажовузи олдини олиш учун зарур бўлган АҚШ хавфсизлик кафолатларини талаб қилмаяпти. Трамп эса Зеленскийнинг сўзларини қадрлашини айтди.
