Россия Хитой ва Ҳиндистон билан нефт савдосида криптовалютадан фойдаланаётгани маълум бўлди

Россия Хитой ва Ҳиндистон билан нефт савдосини олиб боришда Ғарб санкцияларини четлаб ўтиш учун криптовалюталардан фойдаланмоқда. Бу ҳақда Reuters ўз манбаларига таяниб хабар берди.

Агентлик суҳбатдошларининг сўзларига кўра, Россиянинг айрим нефт компаниялари Хитой юани ва ҳинд рупийсини рублга конвертация қилишда биткоин, эфир ва Tether каби стейблкоинлардан фойдаланмоқда. Уларнинг айтишича, бу умумий нефт савдосининг кичик, аммо ўсиб бораётган қисмидир.

Манбаларнинг тушунтиришича, схема қуйидагича ишлайди: хитойлик харидор воситачи вазифасини бажараётган савдо компаниясига офшор ҳисоблардан юанда тўловни амалга оширади, воситачи эса ушбу пулларни криптовалютага конвертация қилади ва бошқа ҳисобрақамга ўтказади. У ердан эса маблағлар Россиядаги учинчи ҳисобрақамга ўтказилади ва рублга конвертация қилинади. Reuters суҳбатдошининг сўзларига кўра, Россияга тегишли битта нефт трейдерининг криптовалютадаги транзакцияси ойига ўнлаб миллион долларни ташкил этади.

Манбаларнинг таъкидлашича, Россияга қарши санкциялар олиб ташланган тақдирда ҳам, нефт савдосида криптовалютадан фойдаланиш давом этиши мумкин — бу операцияларни тезроқ амалга ошириш имконини берадиган қулай восита.

Reutersʼнинг қайд этишича, Россияда криптовалютадан фойдаланиш рағбатлантирилиши ва 2024 йил ёзда криптовалютадан халқаро савдолар учун тўловларни амалга оширишда рухсат берилган бўлса-да, ундан нефт савдосидан фойдаланилаётгани ҳақида энди маълум бўлмоқда.