“Оқибатлари оғир бўлади” — Алишер Қодиров интернетдаги “ахборот лойиҳалари” ҳақида

Олий Мажлис Қонунчилик палатаси депутати, Миллий тикланиш сиёсий партияси раиси Алишер Қодиров ахборот майдонида ҳақорат ва таҳқирлашлар оғир жиноятга тенглаштирилиши ва жиддий жазоланиши кераклигини ёзиб чиқди.

«Кимгадир адоват сочиш учун «халқ» сўзидан қалқон ясаб олаётганлар ортиб бормоқда. Халқ фикрини ифода қилиш ҳуқуқи кимга берилгани Конституцияда белгилаб қўйилган (10-модда), қолган ҳамма ўз номидан гапириши, муҳокама, мунозара қилиши ва оқибатини зиммасига олишни ўрганиши керак», дейди депутат.

Қодиров гапирилган гаплари учун «оқибатни зиммасига олиш» деганда бир неча кун олдин ўзбекистонликларни ҳақоратлагани учун қўлга олинган тиктокер Валерий Югайни мисол келтирган.

Олий Мажлис депутатининг фикрича, бизнес ва бошқарувдагилар тор манфаатларга эришиш учун айрим шахсларни интернет тармоғида мувофиқлаштириш ва йўналтиришни ўрганиб олган ва бунинг оқибатлари оғир бўлади.

«Афсуски, жуда ёмон тажриба, бизнес ва бошқарув тор манфаатларга эришиш учун шахсият ва фаросатда мажруҳларни интернет тармоғида мувофиқлаштириш ва йўналтиришни ўрганиб олди. Қонунлар бундай манипуляторларни тўхтатиши, ким бўлишидан қатъи назар кескин чора кўриши керак (тавсия қиламан, «Нулевой день» телесериалини кўриб чиқинг).

Бундай ахборот лойиҳалари вақти билан бошқариб бўлмайдиган махлуққа айланиб кетиб, биринчи навбатда муаллифлари, кейинчалик, минглаб ёш-у қари, катта-ю кичикни хонавайрон қилиши мумкинлигини Украина инқирози яққол кўрсатиб бермадими?»

Шу сабабли Алишер Қодиров бошчилигидаги Миллий тикланиш партияси эркинлик баҳонасида маданият чегараларини бузадиганларга жазо кучайтирилишини таклиф қилмоқчи.

«Интернет даромад кўриш билан бирга шахсий қарашларни изоҳ қиладиган майдон экани, албатта, яхши, бу сўнгги даврнинг энг фойдали кашфиётларидан бири, буни олқишлаймиз. Лекин эркинлик экан деб тартиб ва маданият чегараларини бузадиган бебошлар билан муросани тўхтатиш керак. «Миллий тикланиш» партияси бу масалада қонунга таклиф тайёрлаб, жамоатчилик билан муҳокама қилмоқчи», — дейилади депутатнинг постида.