Қамчиқда юкхонадаги электроскутерда юз берган қисқа туташув оқибатида Changan ёниб кетди

Тезкор ҳаракатлар натижасида юкхонада бўлган 18 та велосипеддан 9 таси ва 4 та электроскутердан 1 таси ёнғиндан сақлаб қолинган.

Фото: ФВВ

Кеча, 11 апрел куни соат 21:53 да А-373 «Тошкент-Ўш» автомобил йўлининг Қамчиқ довони қисмида ёнғин содир бўлган.

ФВВ хабарига кўра, «Тошкент-Водий» йўналишида ҳаракатланган Changan русумли автотранспорт воситаси юкхонасида бўлган электроскутернинг қувватлагичида юзага келган қисқа туташув натижасида ёнғин келиб чиққани тўғрисида «Қамчиқ» махсус қидирув, ёнғин-қутқарув бошқармасига хабар қилинган.

Шунга кўра, 2 та ёнғин-қутқарув экипажи соат 22:09 да воқеа жойига етиб бориб, ёнғин соат 22:11 да ўраб олинган ва соат 22:12 да ёнғин тўлиқ бартараф этилган.

Ёнғин натижасида автотранспорт воситасининг салон қисми ҳамда юкхонаси ёниб зарарланган. Тезкор ҳаракатлар натижасида юкхонада бўлган 18 та велосипеддан 9 таси ва 4 та электроскутердан 1 таси ёнғиндан сақлаб қолинган.

Ҳодиса оқибатида тан жароҳати олган ва ҳалок бўлганлар йўқ.