АҚШда Марсдан тушган метеорит аукцион орқали сотувга қўйилади

Ноёб космик жисм 2023 йили Нигердан топилган. Савдолар давомида унинг нархи 4 млн долларга етиши мумкин.

Фото: Sotheby’s

Sotheby’s кимошди уйи 16 июл куни Ню-Йоркда ноёб экспонат — Марсдан Ерга тушган энг катта метеоритни сотувга қўяди, деб хабар бермоқда Bild.

Қайд этилишича, NWA 16788 номини олган тошнинг оғирлиги 25 килограммни ташкил этади ва унинг нархи савдолар давомида 4 миллион долларгача кўтарилиши мумкин.

Ноёб космик жисм 2023 йили Нигердан топилган. Олимларнинг ҳисоблашича, у астероиднинг кучли тўқнашуви натижасида Марсдан ажралган ва узоқ йиллардан кейин Ерга метеорит сифатида тушган.

«Бундай топилмалар жуда кам учрайди: бутун дунё бўйлаб Марсга тегишли метеоритлардан қарийб 400 та мавжуд бўлиб, уларнинг аксарияти кичик ўлчамда», — дейилади хабарда.

Sotheby’s ушбу тошни «коллекционерлар учун хазина», деб атади. Кимошди уйининг таъкидлашича, NWA 16788 — шунчаки оғир тош эмас, балки яхши сақланиб қолган метеоритдир.