Ўзбекистоннинг халқаро захиралари биринчи марта 50 млрд доллардан ошди

2025 йил 1 сентябр ҳолатига, Ўзбекистоннинг олтин-валюта захиралари 50,08 млрд долларни ташкил қилди. Захиралар қиймати ўтган ойга нисбатан 1,34 млрд долларга кўп. Бу ҳақда Марказий банк тақдим қилган ҳисоботда келтирилган.

Август ойи давомида захираларнинг валюта қисми 49 млн долларга қисқарган бўлса, олтин қисми 1,38 млрд долларга ошиб 40 млрд долларгача кўпайган.

Захиралар таркибида олтиннинг физик ҳажми ҳам 11,7 млн троя унциядан 11,8 млн троя унцияга ошган.

Жаҳон бозорида олтин нархларининг ошиб бориши фонида йил бошидан бери Ўзбекистоннинг олтин-валюта захиралари сезиларли даражада кўпайди. 1 сентябр ҳолатига қайд этилган 50 млрд 87 млн долларлик захиралар – мамлакат учун тарихий рекорд кўрсаткичдир.

Бундан ташқари, Марказий банк томонидан харид қилинган қимматли қоғозларнинг қиймати ўтган ойда бироз ошиб, 1 млрд 16 млн долларга етган.

Олтин нархининг йил бошидан бери кескин кўтарилиши глобал бозорлар билан бевосита боғлиқ. Феврал–май ойларида жаҳон миқёсида геосиёсий тангликлар ва АҚШ федерал резерв сиёсати туфайли олтин кескин қимматлашди.

Июлда эса қисқа муддатли пасайиш кузатилди. Август–сентябрда нарх яна тикланиб, бу даврда 3,4 фоиз ўсиш қайд этилди. Таҳлилчилар фикрича, бундай тенденция мавсумий талаб (айниқса Осиё бозорида кузги тўй мавсуми) ва глобал иқтисодий ноаниқликлар билан изоҳланади. 5 сентябр куни олтин нархи тарихда биринчи марта 1 унция учун 3 570 доллардан ошди.