Трамп Зеленский ва Путин ўртасида шахсий учрашув ўтказилишини талаб қилмоқда

АҚШ президенти Доналд Трамп вазиятни тинч йўл билан ҳал этиш учун Россия ва Украина президентлари Владимир Путин ва Володимир Зеленскийнинг шахсий учрашуви зарурлигини яна бир бор таъкидлади. Улар Россиянинг Украинага қарши урушини тугатиш учун кучларни бирлаштириши керак, деди Трамп 30 сентябр, сешанба куни Виржиниядаги Куантико ҳарбий базасида АҚШ армиясининг юқори қўмондонлиги олдида.

Америка президентининг сўзларига кўра, натижага фақат «кучли позициядан» эришиш мумкин. Трамп Россия қирғоқлари яқинида «бир-икки сувости кемасини» жойлаштиришга буйруқ бергани ҳақида огоҳлантирди ва АҚШ ядро арсеналини модернизация қилишини эслатди. У АҚШ бундан фойдаланмаслигига умид билдирди. Доналд Трамп, шунингдек, Владимир Путиндан Украинадаги ҳарбий ҳаракатларни тезда тўхтатишини кутгани учун ҳафсаласи пир бўлганини яна бир бор таъкидлади.

Трамп Ғазо сектори ва Украинадаги жанглар унинг маъмурияти воситачилиги ва можароларни бартараф этиш ҳаракатларига қарамай давом этаётганини тан олди. У, шунингдек, Фаластиннинг ҲАМАС гуруҳини АҚШ таклиф қилган Ғазо сектори бўйича тинчлик келишувига рози бўлишга чақирди. «ҲАМАС рози бўлиши керак, агар рози бўлмаса, уларга жуда қийин бўлади», — дея қўшимча қилди у.

Доналд Трамп ва мудофаа вазири Пит Хегсет юқори мартабали ҳарбийлар олдида чиқиш қилар экан, қуролли кучларда мафкуравий силжиш ва эҳтимолий урушга тайёргарлик зарурлиги ҳақида гапирди. Америка президенти тинчлик бўйича Нобел мукофотини олишига ҳам ишонч билдирди.