Украина президенти Володимир Зеленский Украина қуролли кучлари Покровскни тарк этиши мумкинлигини айтиб, Донецк области ғарбидаги ушбу шаҳарда украин ҳарбийлари «жуда мураккаб вазиятда қолгани»ни тан олган.
«Ҳеч ким уларни вайроналар учун ҳалок бўлишга мажбур қилмайди», – деган у Bloomberg учун интервюда.
Зеленский Покровск мудофаасидаги ҳарбийларнинг ҳар қандай қарорини қўллаб-қувватлашини маълум қилган:
Мен у ердаги аскарларимизни, айниқса, командирларни вазиятни назорат қилиш учун олишларини таъминлашда қўллаб-қувватлайман. Акс ҳолда бу биз учун жуда қимматга тушади, биз учун энг муҳими – аскарларимиз ҳаёти.
Зеленскийнинг фикрича, Россия Трампни Украинада урушни тўхтатиш учун Донбассдан воз кечиши кераклигига кўндириш мақсадида Покровскни босиб олишга интилмоқда. «Биз Украина шарқидан кета олмаймиз. Буни ҳеч ким қабул қилмайди, одамларимиз буни қабул қилмайди, – дейди у. – Ва асосийси, ҳеч ким сизга улар у ёки бу шаҳарни босиб олгач, олдинга силжишда давом этмайди, деб кафолат бермайди. Тўхтатиб турувчи омил йўқ».
Покровскдаги вазият
Шу кунларда ижтимоий тармоқларда россиялик ҳарбийлар қалин тумандан фойдаланган ҳолда Покровск ичкарисига кириб олгани акс этган видеолар кенг тарқалди.
Украинанинг 7-десант-штурм корпусида таъкидланишича, об-ҳаво шароити, хусусан, қалин туман Москвани ўз ҳаракатларини фаоллаштиришга ундаган. Россиялик ҳарбийлар кейинроқ украин бўлинмаларини қуршаб олиш учун вайрона ҳолатдаги шаҳарга имкон қадар кўпроқ қўшин киритмоқда.
Россия армияси бир йилдан ошиқ вақтдан буён Покровскни эгаллашга ҳаракат қилиб келади, Володимир Зеленский ҳам туман россияликларга қўл келгани ва вазиятни мураккаблаштирганини айтган.
Шу кунларда ижтимоий тармоқларда вирусдек кенг тарқалган видеода россиялик ҳарбийлар тумандан фойдаланган ҳолда фуқаролик автомобиллари ҳамда мотоциклларда ҳеч қандай қаршиликка учрамасдан, шаҳарга кири келаётганини кўриш мумкин. Видеодаги машиналар ва мотоцикллар жуда эскирганидан келиб чиқиб, кўплаб шарҳловчилар буни келажакдаги жанглар ҳақидаги «Ақлсиз Макс» фантастик филмидаги кадрлар билан таққослади.
