Сурхондарёдаги 38,5 млрд сўмлик давлат харидида қонунбузилиши аниқланди

Коррупцияга қарши курашиш агентлиги томонидан “СурхондарёқурилишИнвест” ДМ буюртмаси асосида ўтказилган давлат харидида қонунбузилиш ҳолати аниқланди.

Агентлик хабарида айтилишича, давлат муассасаси томонидан Танлов савдоларини ташкил этиш консалтинг маркази орқали Бойсун туманидаги бошланғич нархи 38,5 млрд сўм бўлган «Ҳангаронсой» сел сув омборидан насос станцияси ва сув узатиш қувурларини қуриш орқали экин майдонларининг сув таъминотини яхшилаш объектига бош пудратчи аниқлаш учун “Шаффоф қурилиш” махсус ахборот платформаси тизимига эълон берилган.

Электрон тартибда расмийлаштирилган баённомага кўра, ушбу давлат харидида 36,5 млрд сўмлик таклиф билан «Д.Й.Т.» МЧЖ танлов ғолиби, 38,5 млрд сўмлик таклиф билан «М.И.Т.» ХК захирадаги ғолиб деб топилган.

Аниқланишича, тендернинг яна бир иштирокчиси — «Ф.» МЧЖнинг солиқ ҳисоб варағига ноқонуний аралашув йўли билан солиқдан қарздорлик мавжудлиги ҳақида сохта маълумот киритилган.

Натижада жамият “Шаффоф қурилиш” махсус ахборот платформаси орқали тендер жараёнидан асоссиз равишда четлаштирилган.

Агентлик томонидан кўрилган чоралар натижасида мазкур хариднинг бекор қилиниши таъминланди.

Шунингдек, ҳолат юзасидан тўпланган ҳужжатлар асосида ҳозирда ҳуқуқни муҳофаза қилиш органлари томонидан тегишли ҳуқуқий баҳо берилмоқда.