«ЖЧда исталган рақиб тушиши мумкин» — Каннаваро Португалия ва Колумбия билан гуруҳ ҳақида

Мундиалда дебют қиладиган Ўзбекистон терма жамоаси Португалия ва Колумбия билан бир гуруҳдан жой олди. Италиялик мутахассисга кўра, жаҳон чемпионатида рақиб танлашнинг ўзи маъносиз, чунки бу турнирда ҳар бир жамоа кучли.

«Бу — жаҳон чемпионати, бу ерда қуръада ким тушишига қараб шикоят қилиш мумкин эмас. Португалия ҳам, Колумбия ҳам жуда жиддий рақиблар. Футболчиларимиз учун бу беллашувлар катта ҳаяжон ва қимматли тажриба бўлади», — дея таъкидлади Каннаваро.

Унинг сўзларига кўра, асосий мақсад — иштирокнинг ўзи билан кифояланмасдан, ҳар бир ўйинда бор куч билан майдонга тушиш ва гуруҳ босқичи охиригача курашиш: «Мундиалда бўлаётганимиздан жуда мамнунмиз. Энди энг муҳими — тайёргарликни тўғри олиб бориш ва охиригача курашиш», — деди мураббий.