60 минг долларлик грант: ўзбекистонликлар Марказий Осиёнинг нуфузли университетида бепул ўқиши мумкин

Қозоғистондаги Nazarbayev University ўзбек талабалари учун “Абай Қунанбаев” номли грант дастурини таклиф қилмоқда. Ушбу грантлар бакалавриат, магистратура, докторантура ҳамда Foundation тайёрлов дастурларида таҳсил олиш учун ажратилади ва таълим тўловини тўлиқ қоплайди. Грант доирасида IT, бизнес, иқтисодиёт, тиббиёт, муҳандислик, физика, кимё ва бошқа йўналишлар бўйича ўқиш имконияти мавжуд. Ариза топшириш учун IELTS ёки SAT сертификати талаб этилади (камида 6.0 балл), чунки таълим жараёни тўлиқ инглиз тилида олиб борилади.

Грант асосида қабул қилинган талабаларга ойига 80 доллардан 500 долларгача стипендия тўланади.

Nazarbayev University халқаро рейтингларда ўз ўрнини мустаҳкамлаб бормоқда. Университет Times Higher Education (THE) World University Rankings 2026 рейтингида дунёдаги етакчи тадқиқот университетларининг топ 23 фоизи қаторига кирган. Ушбу натижа уни Марказий Осиё ва Кавказдаги энг нуфузли университет, МДҲ давлатлари орасида эса тўртинчи ўринда эканини кўрсатади.

Университет битирувчиларининг 98 фоизи иш билан таъминланади. Улар IT, консалтинг, муҳандислик, энергетика ва тиббиёт соҳаларида фаолият юритади. Битирувчилар ишлаётган компаниялар орасида Google, Meta, McKinsey & Co, KPMG ва Shell каби халқаро корпорациялар бор.

Илмий фаолиятни танлаган талабалар дунёнинг нуфузли университетларида — Stanford, University of Pennsylvania, Columbia University ва бошқа олийгоҳларда магистратура ҳамда PhD дастурларида ўқишни давом эттирмоқда.

Ҳужжатларни қабул қилиш аллақачон бошланган. Ариза топшириш муддатлари университетнинг расмий сайти орқали эълон қилинган.

Nazarbayev University Ўзбекистон иқтисодиёти учун муҳим ҳисобланган бизнес, қурилиш, IT ва тиббиёт йўналишлари бўйича ҳам таълим дастурларини таклиф қилади. Шунингдек, таълим, муҳандислик, компьютер фанлари ва сунъий интеллект соҳаларида кенг қамровли бакалавриат ва магистратура дастурлари мавжуд.

Университетда 60 дан ортиқ давлатдан келган ўқитувчилар дарс беради. Ҳозирда бу ерда Ўзбекистондан 35 нафар талаба таҳсил олмоқда. Остона шаҳрининг марказида жойлашган, 100 гектардан ортиқ майдонни эгаллаган кампусда замонавий ётоқхоналар, спорт иншоотлари ва илмий тадқиқот марказлари фаолият юритади. Университетда 100 дан ортиқ талабалар клуби ва жамоалари мавжуд.

NU етакчи жаҳон университетлари билан қўшма таълим дастурларини ҳам амалга оширади. Жумладан, Hong Kong University of Science and Technology билан ҳамкорликда бизнес-бошқарув бакалавриати, SOAS (University of London) билан глобал масалалар ва Евросиё тадқиқотлари бўйича магистратура, шунингдек амалий сунъий интеллект ва маълумотлар фанлари бўйича магистратура дастурлари йўлга қўйилган.

Реклама ҳуқуқи асосида