Ақлли юриш. Зеленский нега Купянскка борди?

Украина президенти Володимир Зеленский Харкив областидаги Купянск шаҳрига боргани охирги вақтларда фронтда кузатилган энг жиддий воқеа бўлди. Зеленскийнинг айтишича, бу ташрифдан кейин америкаликларнинг унга нисбатан оҳанги ўзгарган. Бу орада Путинга навбатдаги марта Купянск олингани ҳақида ҳисобот беришди. Қуйида шу ҳақда.

{Yii::t(}

Ўтказиб юбориш 6s

Ўтказиб юбориш

Эсингизда бўлса, Америка ва Россия Украинани аралаштирмай урушни тугатишни муҳокама қилиб юрганида Зеленский асабий кайфиятда видеолар эълон қилар, ҳатто Путинни Истанбулга яккама-якка учрашувга таклиф қилганди. Туркияга борганди ҳам, лекин қуруқ қайтганди. Украина президентининг ўша ҳаракати катта сиёсатчиларга хос эмасди, лекин ҳозир Зеленский жуда ақлли юриш қилди.

Америкаликлар Киевни, Донбассни топширишга мажбурламоқчи бўлиб юрган пайтда Украина президенти фронт чизиғида юрибди. Бу «менинг бўлмағур ишларга вақтим йўқ, мамлакатим урушяпти, фронтдаги аскарларим билан учрашишим керак», дегани эди. Ҳақиқий «главнокомандуюший» шунақа бўлиши керак. Унинг асосий иши уруш бўлиши лозим, хорижий сафарлар эмас. Баъзан Украина президенти керак-нокерак хорижий сафарларга жуда кўп вақт сарфлаётгандек кўринади. Мақсад Ғарбдаги иттифоқчилар уни эшитиши бўлса, окопдан чиққан овозни ҳамма эшитади.

«Уч марта эгалланган» Купянск

Зеленский Купянскка боришидан олдин Путинга камида икки марта Купянск олингани ҳақида ҳисобот берилганди. Журналистлар билан учрашув вақтида Путин шаҳар дарёнинг икки томонида жойлашгани, руслар дарёнинг икки томонини назорат қилаётгани, фақат озгина жой қолганини айтганди. Путин дарёнинг икки томони ҳам руслар назоратида эканини таъкидлаб гапирганди, чунки руслар дарёнинг фақат бир томонини эгаллагани ҳақида гаплар кўпайганди.

Путиннинг ишонч билан айтган бу гапидан кейин россияликларда Купянск эгалланганига шубҳа қолмади катта эҳтимол. Лекин шу вақт бирданига Зеленский Купянск стеласи олдидан видео эълон қилиб қолди. Руслар видео эски дейишмаслиги учун уни янги чиққан iPhone-17'да ёзаётганини кўрсатишни ҳам унутмади. Ва бу видео кутилган натижани берди – россиялик уруш тарафдорлари шокка тушди. Россия шаҳарни эгаллаб олган бўлса, Зеленский у ерда нима қилибди юрибди, деб ҳайрон қолди улар.

Зеленский Купянскка бориш орқали ҳаётини хавф остига қўйган, видеода ҳам ўқ овозлари эшитилган, демак Украина президенти тўқнашув кетаётган ҳудудгача борган. Бу таваккалдан мақсад эса битта – Американи, Трампни Путинга ишонмасликка чақириш. «Қаранг, мен Путин эгаллагани ҳақида айтган шаҳарда юрибман, унинг Донбасс ҳақидаги гапларига ишонманглар», дейиш мақсад. Трамп «сенинг картанг йўқ», деб юрганди, Зеленский жонини хатарга қўйиб карта топиб келди, энди унда камида битта «туз» бор, Купянск деган «туз»...

Сезган бўлсангиз, Покровскни эгаллаш ҳам чўзилиб кетди. Ваҳоланки, Покровск ҳам, Купянск ҳам катта шаҳар эмас. Киев энди бор эътиборни шу икки шаҳар мудофаасига қаратади. Музокараларда Россия устун позицияда тургандек кўринганди, лекин Зеленскийнинг Купянскка сафаридан кейин бундай деб бўлмайди. Энди америкаликларда Москванинг куч-қудратига яна шубҳа пайдо бўлди.

Хуллас, Зеленский хатарли операцияни уддалади. Уруш ҳам футболга ўхшайди, азизлар: рақиб сендан кучли бўлса, фақат таваккал эвазига ўйинни ютишинг мумкин. Мудофаада мустаҳкам турасан, ўйин охирида ёки бурчак зарбасида ёки қарши ҳужумда омадинг келишини кутасан. Муҳими ана ўша лаҳзани бой бермасликда. 2010 йилдаги «Барселона» – «Интер» ўйини эсингиздадир?

Ўткир Жалолхонов тайёрлади.
Тасвирчи ва монтаж устаси – Фахриддин Ҳотамов.