АҚШ Демократик партияси оралиқ сайловларда ғалаба қозонганидан сўнг Украина президенти Володимир Зеленский Киев Вашингтон томонидан кўпроқ қўллаб-қувватланишига умид билдирмоқда. Украина раҳбари бу ҳақда 4 ноябр, чоршанба куни Германиянинг ZDF телеканалига берган интервюсида маълум қилди.
Зеленскийнинг сўзларига кўра, сайлов натижасида нафақат Сенатда, балки АҚШ Вакиллар палатасида ҳам кўпчилик ўринларни эгаллаган демократлар «АҚШ ва Европа ўртасидаги алоқаларни янгилаш» тарафдори.
Украина президентининг таъкидлашича, агар АҚШ Конгресси ҳозирда Европа давлатлари амалга ошираётган ва намойиш этаётганидек, Украинага катта миқдорда молиявий ёрдам ажратиш ҳамда қурол-яроғ етказиб беришни қўллаб-қувватласа, бу ижобий омилга айланиши ва Россия президенти Владимир Путинга таъсир кўрсатиши мумкин.
Зеленский Мелания Трампни Олешкидаги гуманитар миссияси учун орден билан тақдирлади
Шу куни Украина президентининг расмий веб-сайтида АҚШ биринчи хоними Мелания Трампни миллий мукофот — I даражали Княгиня Олга ордени билан тақдирлаш тўғрисидаги фармон эълон қилинди.
Мелания Трамп Россия томонидан босиб олинган Херсон вилоятидаги Олешки шаҳрида вақтинчалик ўт очишни тўхтатиш бўйича келишувга эришишдаги роли учун ушбу мукофотга сазовор бўлди.
Фармон матнида Мелания Трампнинг «Украинани гуманитар қўллаб-қувватлашга қўшган салмоқли шахсий ҳиссаси, шунингдек, инсон ҳуқуқларини ҳимоя қилиш ва хайрия соҳасидаги фаол ҳаракатлари» алоҳида қайд этилган.
Аввалроқ АҚШ президенти Доналд Трампнинг рафиқаси украиналик болаларни қўллаб-қувватлаб, бир неча бор чиқиш қилган эди.
