Украина президенти Володимир Зеленский 6 ноябр, жума куни Россия ҳужумлари оқибатида Киевда сув ва электр энергияси таъминотининг узоқ вақтга узилиши муносабати билан шаҳар мэри Виталий Кличкони танқид қилди.
«Шаҳар даражасида тайёргарлик барбод бўлган», — деди президент.
«Аслида, бу иситиш мавсумига ва Россиянинг Украина энергетикасига қарши ушбу операциясига тайёргарлик кўриш бўйича шаҳар даражасида қабул қилинган қарорлар бажарилмаганининг оқибатидир», — деди Зеленский кечки мурожаатида.
Унинг қўшимча қилишича, ҳукумат энергетика компаниялари вакиллари билан инфратузилмани тиклаш ишларига қўшимча бригадаларни жалб этиш ва таъмирлаш жараёнини тезлаштириш заруратини муҳокама қилган.
Кличко Зеленскийга жавоб қайтарди
Украина раҳбарининг баёноти эълон қилинганидан бир неча соат ўтиб, Киев мэри ўзига қаратилган танқидларга жавоб берди.
«Пойтахт қандай қилиб “Россиянинг Украина энергетикасига қарши махсус операцияси”нинг олдини олиши керак эди? Киев раҳбарияти вакилларини таклиф қилмасдан, шаҳарнинг тайёргарлиги ва саъй-ҳаракатлари қайси йиғилишларда ва кимлар билан муҳокама қилинмоқда?» — дея савол қўйди Виталий Кличко ўзининг Telegram каналида.
Кличко, шунингдек, президент Украинада ўзаро боғланган ягона энергетика тизими мавжудлигидан хабардорми, деган саволни ўртага ташлади.
«Бутун мамлакат бўйлаб энергетика тизими вайрон қилинаётган бир пайтда, бир жойда чироқлар ёниб туриши, бошқа жойда эса ҳамма нарсани Кличко ўчириб қўйган бўлиши мумкин эмас», — деди у.
«Марказий ҳокимиятнинг “Киев — энг ёмони” деган гапни такрорлайвериши, доимий манипуляциялар ва ёлғонлар — бу жуда ёмон ҳолат», — деди пойтахт мэри.
Кличконинг таъкидлашича, марказий ҳокимият «Кличкодан қутулишга уриниб», шу билан бирга пойтахтга ёрдам бермасдан, амалда «Киевни вайрон қилмоқда».
Зеленский: Россия зарбалари оқибатларини бартараф этишга Украина Қуролли кучлари ҳам жалб қилинади
Зеленский 6 ноябрдаги кечки мурожаатида Россия ҳужумлари кучайишига жавобан таъмирлаш бригадалари сони оширилиши, шунингдек, зарбалар оқибатларини бартараф этишга Украина Қуролли кучлари ҳам ёрдам бериши ҳақида маълум қилди.
