Эстония ТИВ раҳбари Шрёдернинг Россия ҳақидаги гапларини танқид қилди

Эстония ташқи ишлар вазири Маргус Цахкна Германиянинг собиқ канцлери Герхард Шрёдерни танқид қилди. Шрёдер “Россияни абадий душман сифатида демонизация қилиш”га қарши чиқиб, РФдан “арзон энергия ташувчилар” етказиб беришни қайта йўлга қўйишни қўллаб-қувватлаган. Цахкна якшанба, 25 январ куни X ижтимоий тармоғида шундай деб ёзди: “Иккинчи жаҳон уруши тугаганидан бери Европадаги энг шафқатсиз урушни олиб бораётган мамлакатни ‘демонизация қилмаслик’ка чақиришлар ва ҳатто энергетик ҳамкорликни қайта тиклашга ишоралар — бу шунчаки даҳшатли”.

Унинг фикрича, Украинадаги уруш “кўп йиллик юмшатиш сиёсати ва савдо тажовузни жиловлайди, деган ўн йиллар давомидаги ишончнинг тўғридан тўғри натижаси” бўлган. “Бу ишонч қайта қуролланишни молиялаштирди ва Европада агрессорнинг пул оқимини таъминлаб турган энергетик қарамликни мустаҳкамлаб қўйди”, — деб ҳисоблайди Цахкна. У Германия ташқи сиёсатининг Wandel durch Handel (“Савдо орқали ўзгаришлар”) тамойилига асосланган йўналишини “омадсиз” ва “ортга қайтмас тарзда ўтмишда қолган” деб атади.

23 январ куни Berliner Zeitung газетасида эълон қилинган мақолада собиқ канцлер, жумладан, Украинадаги урушни “халқаро ҳуқуқни бузиш, инсон ҳуқуқларини бузиш” деб атаган. Шу билан бирга, у “Россияни абадий душман сифатида демонизация қилиш”га қарши чиққан. “Россия — варварлар мамлакати эмас, бой маданиятга эга ва Германия билан турли тарихий алоқалари бўлган мамлакат”, — деган Шрёдер.

Сиёсатчи Германия канцлери лавозимида бўлган даврида илгари сурган Россия билан яқинлашув сиёсатини тўғри, деб ҳисоблашини таъкидлаган. Унинг сўзларига кўра, Германияга Россиядан “арзон энергия ташувчиларнинг хавфсиз ва ишончли импорти” зарур.

Шрёдер, шунингдек, Евроиттифоқ халқаро аҳамиятини йўқотаётгани сабабларидан бири сифатида Вашингтон ва Москва Брюсселни четлаб ўтиб Украинанинг келажаги ҳақида келишиб олаётганини қайд этган. Сиёсатчи Доналд Трамп президентлиги фалокатли оқибатларга олиб келиши мумкин, деб ҳисоблайди, чунки у нафақат “Гренландияни ўзлаштириб олиш”га уринмоқда, балки “ЕИни АҚШга янги қарамликка киритмоқчи”.

Герхард Шрёдер 1998 йилдан 2005 йилгача Германия канцлери лавозимида ишлаган. Истеъфодан кейин у бир неча бор Россия билан боғлиқ лойиҳаларда иштирок этган. Сиёсатчи “Шимолий оқим” (Nord Stream) лойиҳаси оператори бўлган компаниянинг директорлар кенгашига, шунингдек, “Роснефть”нинг директорлар кенгашига раҳбарлик қилган. Шрёдер Владимир Путинга яқин дўст ҳисобланади.

РФ Украинага кенг кўламли ҳужумни бошлаганидан кейин, сиёсатчи Кремл билан яқин алоқалари сабаб танқид остида қолган ва собиқ канцлер сифатида фойдаланиб келган айрим имтиёзларидан маҳрум этилган. Шрёдер 2022 йил бошида уни “Газпром” директорлар кенгашига киритиш таклифини рад этган, шунингдек 2017 йилдан бери эгаллаб келган “Роснефть” директорлар кенгаши раиси лавозимини ҳам тарк этган.