Зеленский блэкаут фонида Киев шаҳар маъмуриятини танқид қилди

Украина президенти Володимир Зеленский Россия ҳужумларидан кейин Киевда иссиқлик ва электр таъминоти билан боғлиқ оғир вазият учун масъулиятнинг бир қисмини шаҳар ҳокимияти зиммасига юклади. “Жиҳоз-ускуналар қиш киришидан олдинроқ сотиб олиниб, тайёр ҳолатга келтирилиши керак эди, Киев шаҳар маъмурияти эса ҳозир бир неча баравар тезроқ ҳаракат қилиши шарт — ҳеч бўлмаганда феврал ойида одамларнинг ҳаётини енгиллатиш учун”, — деди Зеленский чоршанба, 28 январ куни кечқурунги видео мурожаатида.

28 январ кечқурунги ҳолатга кўра, Украина пойтахтидаги 639 та кўп қаватли уй иссиқлик таъминотисиз қолганини Киев мэри Виталий Кличко Telegram’да ёзди. Унинг айтишича, РФ армиясининг энергия объектларига берган зарбалари оқибатларини бартараф этиш устида коммунал хизматларнинг 1000 нафардан ортиқ ходими ишламоқда. Пойтахт мутахассисларига Лвив, Полтава, Чернихив, Винница, Житомир, Миколайив, Одесса, Ровно, Кропивницкий ва Украинанинг бошқа шаҳарларидан келган бригадалар ёрдам беряпти. Шунингдек, “Укрзализниця” темирйўл компанияси ходимлари ҳам жалб этилган.

ГФРнинг Украинадаги янги элчиси Ҳайко Томс “Суспільне” телеканалига берган интервюсида Германия Киевга 33 та мобил иссиқлик-электр станциясини етказиб беришини билдирди. Улар яқин вақт ичида олиб келинади. “Бу 33 та қурилма Украинада миллионлаб одамларни электр энергияси билан таъминлай олади. Масала — уларни улашда, худди генераторларда бўлгани каби. Лекин биз буни имкони борича тезроқ қилиш учун бирга ишлаймиз”, — деди Томс.

Украина пойтахтида Россиянинг оммавий зарбаларидан кейин тахминан 610 минг истеъмолчи ҳали ҳам электр таъминотисиз қолмоқда. Бу ҳақда мамлакат энергетика вазири Денис Шмихал 28 январ куни кечқурун Telegram-каналида хабар қилди. Унинг таъкидлашича, тармоқ инфратузилмасига етган шикастлар нотекис бўлгани сабаб Киевнинг энергия тизимидаги вазият ҳали ҳам мураккаблигича қолмоқда.