Тошкентга учган самолётлар Самарқанд ва Бишкекка қўнишга мажбур бўлди

Тошкент халқаро аэропорти ҳудудидаги ноқулай об-ҳаво шароити — кучли чақмоқ сабаб бир нечта авиарейс экипажлари қўниш учун муқобил аэродромларга йўналиш олишга қарор қилди.

Фото: Kun.uz

Тошкент аэропортида кузатилган ноқулай об-ҳаво шароити (кучли чақмоқ) туфайли бир нечта рейслар муқобил аэродромларга йўналтирилди.

Хусусан, Uzbekistan Airways авиакомпаниясининг Мале — Тошкент йўналишидаги HY3526 рейси экипажи Самарқанддаги муқобил аэродромга йўл олишга қарор қилди.

Шунингдек, Uzbekistan Airways авиакомпаниясининг Остона — Тошкент йўналишидаги HY722 рейси экипажи ҳам Самарқанддаги муқобил аэродромга йўналиш олишни маъқуллади.

Бундан ташқари, China Southern Airlines авиакомпаниясининг Пекин — Тошкент йўналишидаги CSN6027 рейси экипажи Бишкекдаги муқобил аэродромга йўналиш олишга қарор қилди.